Të paktën 27 persona kanë vdekur dhe katër të tjerë rezultojnë të zhdukur pasi tajfuni i fuqishëm Otis përfshiu qytetin turistik Acapulco dhe periferitë e tij në Meksikën jugperëndimore, tha sot qeveria meksikane.
Presidenti Andres Manuel Lopez Obrador tha se qeveria po punonte për të rivendosur energjinë elektrike dhe për të pastruar shkatërrimin e shkaktuar nga tajfuni i kategorisë 5, i cili shkaktoi dëme të mëdha në qytetin jugor të Guerreros dhe ndërpreu rrugët me Akapulkon.
“Ajo që përjetoi Acapulco është shkatërruese,” tha Presidenti Obrador. Otis përmbyti rrugët, shkatërroi çatitë e shtëpive dhe hoteleve, ndërpreu komunikimet, aksesin rrugor dhe ajror.
Dëmtimi i linjave telefonike dhe elektrike e bëri të vështirë për autoritetet që të vlerësojnë shpejt shkallën e dëmit.
Gati 8,400 anëtarë të ushtrisë, forcave ajrore dhe gardës kombëtare të Meksikës janë vendosur pranë Acapulco për të ndihmuar me operacionet e pastrimit, tha ministria e mbrojtjes.
Mësimet u anuluan për studentët në të gjithë shtetin për të dytën ditë dhe guvernatori Evelyn Salgado tha në mediat sociale se autoritetet po punonin për të rivendosur energjinë elektrike dhe rifillimin e pompave të ujit të pijshëm në Acapulco.
Më shumë se 1,300 punonjës të kompanisë shtetërore të energjisë elektrike CFE po punojnë për të rivendosur energjinë pasi 300,000 njerëz janë pa energji elektrike.
Aeroporti ndërkombëtar i qytetit u mbyll pasi Otis shkatërroi kullën e kontrollit, ndërpreu telekomunikacionin dhe bllokoi hyrjen në rrugë.
