Një adoleshente iraniane është në gjendje kritike pas një konfrontimi me autoritetet në metronë e Teheranit për një shkelje të ligjit të hixhabit, sipas Reuters.
Rasti i Armita Geravand është shumë i ndjeshëm, duke ngritur shqetësime se 16-vjeçarja mund të ndërrojë jetë si Mahsa Amini, një vajzë 22-vjeçare, e cila vdiq vitin e kaluar kur ishte në paraburgim nga policia morale. Vdekja e saj shkaktoi muaj protestash mbarëkombëtare.
Ndërsa autoritetet kanë mohuar pretendimet e aktivistëve se Geravand ra në koma të dielën pasi u sulmua nga forcat e sigurisë që zbatonin kodin islamik të veshjes, grupi i të drejtave kurde iraniane, Hengaw publikoi një foto të saj pa ndjenja në një spital të Teheranit, ku ajo u dërgua pas incidentit.
Nuk pati asnjë përgjigje të menjëhershme nga ministria e brendshme e Iranit ndaj një kërkese për koment mbi incidentin.
“Ne po e monitorojmë nga afër rastin e saj. Ajo është në gjendje kome në Repartin e Mjekimit Intensiv të spitalit dhe gjendja e saj është kritike”, tha një aktiviste.
Një aktivist i dytë tha se forcat e sigurisë i kishin ndaluar prindërit e Geraand-it të postonin foton e saj në mediat sociale ose të flisnin me grupet e të drejtave të njeriut.
Pamjet e ndara me IRNA treguan Geravand pa hixhabin e detyrueshëm të shoqëruar nga dy shoqe femra duke ecur drejt trenit nga platforma e metrosë. Pasi hynë në kabinë, njëra nga vajzat shihet duke u rrëzuar, përpara se një vajzë tjetër të tërhiqet zvarrë pa ndjenja nga kabina nga pasagjerët.
Një gazetare iraniane u arrestua të hënën kur shkoi në spital për të pyetur për gjendjen e Geravand, raportuan mediat iraniane.
Ministrja e Jashtme gjermane Annalena Baerbock në platformën e mediave sociale X tha se “edhe një herë një grua e re në #Iran po lufton për jetën e saj. Vetëm sepse ajo tregoi flokët e saj në metro. Është e padurueshme. Prindërit e #ArmitaGarawand nuk kanë të drejtë të jenë para kamerave, por kanë të drejtë të jenë pranë shtratit të vajzës së tyre”.
