Pasditen e së shtunës, mitiku italian “San Siro” do të mirëpresë “derbin e Madoninës”, mes Inter e Milan, të parin për këtë sezon, ndeshje e cila pritet të dhurojë spektakël dhe emocione për futbolldashësit.
I intervistuar nga kanali zyrtar i Serie A, për këtë përballje foli dhe mesfushori më i ri i Milan, Ruben Loftus-Cheek, i cili përveç derbit ka prekur gjithashtu dhe tema të ndryshme të futbollit italian.
“Pyeta shokët e mi se si është atmosfera. Ata më thanë se do ta kuptoj vetë kur të jemi aty. Mezi pres të luaj një ndeshje si kjo. E di sa e rëndësishme është për tifozët dhe për klubin. Këto janë ndeshjet që të gjithë ëndërrojnë t’i luajnë”,- u shpreh mesfushori anglez.
Më tej, Loftus-Cheek foli dhe për kalimin e tij te Milan, teksa shtoi se në momentin e parë kur zbriti në fushë e kuptoi se çfarë do të thotë të veshësh fanellën e “kuqezinjve”.
“E kuptova se çfarë do të thotë të veshësh këtë fanellë. Mbështetja e tifozëve na shtyn gjithmonë të japim më të mirën tonë. Zhurma e San Siros në golin tonë të parë (kundër Torinos) është diçka që nuk do ta harroj kurrë. Ishte fantastike, një tingull i çmendur”,- u shpreh “fantazisti”. /i.m /abcnews.al
