Jurgen Klopp është trajneri i momentit. Gjermani është një idhull në Anfield dhe të gjithë janë të dashuruar pas futbollit të tij. 52-vjeçari riktheu Champions League sezonin e kaluar në Liverpool pas 14 vitesh dhe para pak ditësh u shpall trajneri më i mirë.
“The Reds” kryesojnë Premier League me pikë të plota (21) dhe ndodhen në rrugë të mbarë për t’u rikthyer te titulli kampion, që mungon prej vitit të largët 1990. Kontrata e Klopp përfundon në vitin 2022 dhe nuk përjashtohet provimi i një aventure të re, pavarësisht se gjendet për mrekulli tek ekipi aktual.
Për të shqetësuar tifozët e kryesuesve ka menduar Sunday Mirror, që raporton se Klopp pëlqehet shumë nga Federata Gjermane e Futbollit. Ai shihet si pasardhësi perfekt i Joachim Loew dhe ulja në stolin e kombëtares së vendit të tij e tundon atë. Drejtuesit e Federatës janë gati t’i ofrojnë kampionit të Evropës një ofertë të parefuzueshme, edhe pse vështirë që ai të largohet nga ishulli përpara vitit 2022. /abcnews.al
