7 janar 2014, një ditë që në kampin bardheblu mbahet mend si hera e fundit që triumfuan në derbi. Realizonte Gilberto, në një sezon që Tirana rrezikonte të binte në Kategorinë e Parë. Nga atëherë nuk ka pasur ditë të bardha në derbi, edhe pse në ndonjë ndeshje kanë “flirtuar” më fitoren. Në fund maksimumi ka qenë barazimi.
Janë bërë plot 17 ndeshje derbi që Tirana nuk ia del të fitojë. Partizani ka gëzuar 9 herë fitore, kurse 8 përballjet e tjera janë mbyllur në barazim. “demat” kanë gjetur rrugën e rrjetës 21 herë në këto sfida për nderin e kryeqytetit. Tifozët bardheblu kanë festuar vetëm 10 gola, një shenjë e superioritet që Partizani ka pasur në këto pesë vitet e fundit.
E diela i sjell përballë sërish këto dy ekipe. Edhe pse nuk do të luhen natën me drita, spektakli zor se do të mungojë. Të paktën jo në tribuna, pasi në fushë mund të ketë edhe llogari. Humbjen nuk e dëshiron askush dhe shpesh ndeshje të tilla kthehen në shah.
Gaz Demi e ka thënë: “Sa të jem unë presidenti, Tirana nuk fiton në derbi”. Në kampin bardheblu nuk kanë ndërmend të zmbrapsen në derbin e vetëm që në këto vitet e fundit ata mund të cilësohen si favoritë, nëse mund të pranohet që ka të tillë në derbi. /abcnews.al
