Australia dhe SHBA filluan një stërvitje ushtarake dy-javore, duke përfshirë më shumë se 30,000 trupa nga 11 vende të ndryshme në një shfaqje force dhe uniteti.
Stërvitja Talisman Sabre vjen në një kohë kur Kina po pretendon një rol më të madh në Indo-Paqësorin. Kjo stërvitje mbahet çdo dy vjet që nga viti 2005. Këtë vit, pritet të kalojë çdo stërvitje të mëparshme.
“Ne jemi të lidhur me vlera të përbashkëta”
“Mesazhi më i rëndësishëm që Kina mund të marrë nga stërvitja, dhe nga gjithçka që aleatët dhe partnerët tanë bëjnë së bashku, është se ne jemi të lidhur me vlerat thelbësore të përbashkëta nga vendet tona”, tha Sekretari i Marinës së SHBA, Carlos Del Toro gjatë një ceremonie hapjeje në bordin e një luftanijeje në Sydney.
Stërvitjet, të cilat do të zhvillohen në vende të ndryshme në të gjithë Australinë, do të përfshijnë luftime tokësore dhe ajrore, si dhe ulje amfibe.
“Stërvitjet demonstrojnë angazhimin e Australisë për të punuar me partnerët tanë ndërkombëtarë për të ruajtur sigurinë dhe stabilitetin e rajonit tonë,” tha në të njëjtën ceremoni Ministri i Mbrojtjes Richard Marles.
Këtë vit Gjermania do të marrë pjesë për herë të parë, me 210 parashutistë dhe marinarë, duke forcuar praninë e saj në Indo-Paqësorin.
Stafi nga India, Filipinet, Singapori dhe Tajlanda do të marrin pjesë gjithashtu në rolin e vëzhguesit.
Thellimi i bashkëpunimit
Australia po thellon bashkëpunimin e sigurisë me SHBA-në dhe partnerët rajonalë si Japonia dhe India, ndërsa qeveria laburiste e qendrës së majtë kërkon të rivendosë lidhjet tregtare me Kinën, të cilat janë tensionuar nga mosmarrëveshjet mbi tregtinë, investimet dhe sigurinë.
Një anije kineze është aktualisht në brigjet lindore të Australisë dhe pritet të monitorojë stërvitjet, sipas një zyrtari australian.
