Spanjë, 5 viktima dhe 3.500 të evakuuar nga përmbytjet

Të paktën 5 persona kanë vdekur dhe rreth 3 mijë e 500 të tjerë janë evakuuar në dy ditë shira të dendura që përfshinë pjesën jug-lindore të Spanjës. Në këtë zonë të shtetit iberik shumë rrugë, hekurudha dhe aeroporte u mbyllën të premten për shkak të situatës problematike. Ndërkohë, ekipet e emergjencave vijuan operacionet e kërkim-shpëtimit për njerëzit e bllokuar në tunelet e akseve rrugore. Përmbytjet morën me vete automjete dhe objekte të tjera në rajonet e Valencias, Mursias dhe Andaluzisë lindore. Në total 74 rrugë u mbyllën, ndërsa shërbimi hekurudhor rajonal u pezullua, bashkë me atë në aeroportin e Mursias. Edhe segmenti hekurudhor që lidh Alikanten me Madridin dhe Barcelonën u mbyll për shkak të përmbytjeve. Në disa nga zonat e prekura u regjistruan nivele rekord të shirave për muajin shtator dhe mbetën të mbuluara nga ujërat edhe gjatë së premtes. /ABC News Albania 24/7