Lokali i natës në ish-Bllok, ku pati kontroll për drogë, ishte kthyer prej disa muajsh në qendër të tregtimit të drogave të forta në kryeqytet. Hetimet kishin nisur rreth 6 muaj më parë, ndërsa në pranga përfunduan 4 persona.
Lokali në zonën e ish-Bllokut që dyshohet se shiste kokainë dhe që kishte kthyer ambientet e tij për përdorimin e lëndëve narkotike mbahej në survejim prej 6 muaj nga sektori kundër trafiqeve në Policinë e Tiranës.
Ky ambient ne rrugën “Vaso Pasha”, frekuentohej në masë nga të rinjtë e kryeqytetit. Në të shkonin “DJ” të njohur dhe këngëtar të muzikës live. Nga hetimet e kryera nga policia dhe prokuroria, dyshohet se skemën e drejtonte pronari i lokalit Orial Peçi, 38 vjeç.
Bashkë me të, në pranga ranë edhe administratori i lokalit, Arbër Alkurtaj 22 vjeç, kamerieri Albi Llangozi dhe një klient të cilët ju gjet një thikë dhe 6 fishekë. Gjatë kontrollit në një ambient të veçuar të banakut, u gjetën kokainë, e sende të tjera që shërbejnë për mbajtjen e lëndës narkotike.
Gjithashtu edhe dy klientëve u është gjetur nga një dozë me kokainë që dyshohet se e kishin blerë në ambientet e lokalit për ta konsumuar. Në gjendje të lirë po hetohen edhe tre persona të tjerë për prodhim dhe shitje të narkotikëve dhe për mbajtjen pa leje të armëve shpërthyese dhe i municionit.
Veç të arrestuarve, në këtë operacion të koduar “Blloku”, u shoqëruan edhe mjaft persona të pranishëm që ndodheshin në lokal, ndërsa u sekuestrua edhe serveri i pamjeve të kamerave të sigurisë që dispononte lokali për të bërë të mundur dokumentimin e plotë të hetimit./ABC News Albania 24/7
