Bjellorusia njoftoi sot se ka një përqendrim të konsiderueshëm të trupave ukrainase pranë kufirit të saj dhe paralajmëroi se kjo përbën një kërcënim për sigurinë e saj.
“Aktualisht një grup i rëndësishëm i ushtrisë ukrainase është vendosur shumë afër sektorit bjelloruso-ukrainas të kufirit,” tha ministria e mbrojtjes e vendit në një postim në Telegram.
“Diçka e tillë mund të përshkallëzohet në incidente kufitare,” shtoi ai.
Më herët sot, presidenti i Bjellorusisë, Aleksandër Lukashenko tha se vendi do të krijojë një forcë të re të vullnetarëve për të mbrojtur territorin e tij, në mënyrë që të gjithë të trajnohen në përdorimin e armëve, të jenë në gjendje të reagojnë nëse vendi sulmohet dhe të kontribuojnë në ruajtjen e rendit publik.
Ukraina është e shqetësuar se Bjellorusia do t’i bashkohet luftës. Lukashenko, nga ana e tij, ka deklaruar se kjo do të ndodhë vetëm nëse vendi i tij sulmohet nga Kievi.
Ushtria bjelloruse prej muajsh po kryen stërvitje të përbashkëta ushtarake me Rusinë. Mykhailo Podoliak, një këshilltar i presidentit ukrainas Volodymyr Zelensky, akuzoi sot se Bjellorusia po rrit “retorikën e saj agresive dhe militariste” përpara përvjetorit të parë të pushtimit rus të Ukrainës, por shtoi se Kievi nuk përbën asnjë kërcënim.
/abcnews.al
