Dy të rinj kanë rënë në prangat e policisë së Dibrës, të cilët ishin pjesë e dy grupeve kriminale për kalim të paligjshëm të kufirit. Arrestimi i tyre erdhi në kuadër të një operacioni të nisur një vit më parë, ku janë kapur 14 shtetas që e ushtronin këtë veprimtari kriminale, në formën e 2 grupeve.
Njoftimi i policisë:
Finalizohet faza e katërt e operacionit policor të koduar “SMUGGLING”, për goditjen e veprimtarisë kriminale të dhënies ndihmë për kalim të paligjshëm të kufirit.
Ekzekutohen masat e sigurisë “Arrest në burg”, për 2 shtetas.
Gjatë 3 fazave të tjera të operacionit, i cili ka nisur rreth 1 vit më parë, janë vënë në pranga 14 shtetas që e ushtronin këtë veprimtari kriminale, në formën e 2 grupeve.
Specialistët e Seksionit për Hetimin e Trafiqeve të Paligjshme dhe Narkotikëve të DVP Dibër, në vijim të punës hetimore të zhvilluar nën drejtimin e Prokurorisë pranë Gjykatës së Rrethit Gjyqësor Dibër, në kuadër të operacionit policor të koduar “SMUGGLING”, për goditjen e veprimtarisë kriminale të dhënies ndihmë për kalim të paligjshëm të kufirit, kanë organizuar fazën e katërt të këtij operacioni.
Gjatë kësaj faze u bë ekzekutimi i vendimit të Gjykatës së Shkallës së Parë Dibër, e cila ka vendosur masat e sigurisë “Arrest në burg”, për veprën penale “Ndihma për kalim të paligjshëm të kufijve”, për shtetasit:
M. Z., 28 vjeç, banues në Shkodër dhe R. Gj., 23 vjeç, banues në Tiranë.
Nga hetimet e kryera dhe provat e siguruara ka rezultuar se këta shtetas, në bashkëpunim me shtetasit e arrestuar gjatë 3 fazave të mëparshme të operacionit “SMUGGLING”, u kanë dhënë ndihmë, kundrejt pagesave, shtetasve me origjinë siriane, për kalimin e paligjshëm nga Shqipëria në drejtim të vendeve të BE-së.
Vijojnë hetimet për identifikimin e personave të tjerë të implikuar në këtë aktivitet kriminal dhe kapjen e atyre të shpallur në kërkim.
Materialet i kaluan Prokurorisë pranë Gjykatës së Rrethit Gjyqësor Dibër, për veprime të mëtejshme.
