Rreth 80 emigrantë afrikanë dyshohet të kenë humbur jetën në ujërat e Mesdheut, në përpjekje për të arritur Europën. Mjeti lundrues me të cilin udhëtonin ishte nisur nga Libia dhe u fundos në brigjet e Tunizisë.
Të paktën 80 emigrantë afrikanë druhet të kenë humbur jetën pasi varka me të cilën po udhëtonin u përmbys në brigjet e Tunizisë, në përpjekje për të arritur Europën. Katër persona që arritën të mbijetonin, njëri prej të cilëve ndërroi jetë më vonë në spital, deklaruan për rojet bregdetare se varka ishte fundosur në ujërat që lagin qytetin Zarzis. Ata thanë gjithashtu se, shumica e emigrantëve ishin mbytur.
Ndërkohë, një zyrtar tunizian në dijeni të çështjes tha se emigrantët ishin nisur nga qyteti Zuara, në Libi. Bregu perëndimor i Libisë vazhdon të mbetet pika kyçe për nisjen e emigrantëve që duan të arrijnë kontinentin e vjetër, edhe pse nisjet kanë rënë si pasojë e mbështetjes që vendet evropiane, me në krye Italinë, i kanë dhënë rojës bregdetare libiane për të çmontuar rrjetet e trafikut të qenieve njerëzore.
Megjithatë, situata e fundit në Libi, ku gjenerali Khalifa Aftar po përpiqet të rrëzojë qeverinë e mbështetur nga Perëndimi ka gjasa të shtyjë shumë libianë të lënë vendin e tyre. Të paktën 65 emigrantë që ishin drejtuar për në Evropë nga Libia humbën jetën në muajin maj në rrethana të ngjashme./ABC News Albania 24/7
