Një tërmet me magnitudë 6.2 goditi brigjet lindore të Tajvanit, tha agjencia meteorologjike dhe sizmologjike e ishullit.
Deri më tani nuk raportohet për viktima apo dëme të rënda materiale nga lëkundjet, të cilat janë ndjerë edhe në kryeqytetin Taipei.
Epiqendra ishte në zonën detare 30 kilometra larg bregut të Hualien. Thellësia fokale ishte e vogël, vetëm gjashtë kilometra.
Instituti Gjeofizik Amerikan (USGS) vlerësoi se tërmeti kishte një magnitudë më të ulët, 5.9 gradë dhe një thellësi fokale më të madhe, 12 kilometra. Qendra Sizmologjike Euro-Mesdhetare (EMSC) llogariti nga ana e saj se fuqia e lëkundjes ishte 6.1.
Tajvani goditet shpesh nga tërmete të forta, pasi shtrihet mbi një pikë ku kryqëzohen dy pllaka tektonike.
Tërmetet me magnitudë 6 ose më të lartë mund të jenë vdekjeprurës, por kjo varet nga vendndodhja dhe thellësia fokale. Në shtator, një tërmet më i fortë me magnitudë 6.9, gjithashtu në Tajvanin lindor, vrau një person dhe dëmtoi ndërtesa.
Më shumë se 100 njerëz u vranë për shkak të një tërmeti në pjesën jugore të vendit në vitin 2016.
Një tërmet jashtëzakonisht shkatërrues me magnitudë 7.3 vrau më shumë se 2,400 njerëz në Tajvan në vitin 1999./Abcnews.al/
