Disa orë pasi Rusia pushtoi Ukrainën në shkurt, punonjësit e shëndetësisë në jug nisën një plan sekret për të mbrojtur fëmijët. Kishte dyshime se rusët rrëmbyen jetimët dhe po i dërgonin në Rusi, kështu që punojësit në spitalin e fëmijëve në Kherson ndryshuan të dhënat mjekësore të këtyre fëmijëve në mënyrë që të ndihmonin në largimin e tyre nga vendi.
“Ne shkruam qëllimisht informacione të rreme se fëmijët ishin të sëmurë dhe nuk mund të transportoheshin”, tha Dr. Olga Piliarksa, Shefja e Departamentit të Kujdesit Intensiv.
“Ne kishim frikë se rusët do ta merrnin vesh por vendosëm që do t’i shpëtonim fëmijët me çdo kusht.”
Gjatë gjithë luftës, rusët janë akuzuar për dëbimin e fëmijëve nga Ukraina dhe dërgimin e tyre ose në Rusi ose në zonat e kontrolluara nga Rusia. Sipas autoriteteve lokale, të paktën 1000 fëmijë janë rrëmbyer nga shkollat dhe jetimoret në Kherson ndërsa rajoni ka qenë nën pushtimin rus.
Vendndodhja e tyre sot mbetet e panjohur. Megjithatë, banorët thonë se më shumë fëmijë do të ishin zhdukur nëse ata nuk do të përpiqeshin t’i mbronin, raporton abcnews.al.
Në fillim të pushtimit, një grup lokal u përpoq të fshihte fëmijët në një kishë. Sipas vendasve, disa muaj më vonë, rusët i gjetën, i kthyen në jetimore dhe më pas i braktisën. Associated Press raportoi në një raport se Rusia po përpiqet të largojë mijëra fëmijë nga Ukraina në mënyrë që t’ua japë familjeve ruse për kujdestari ose birësim.
AP zbuloi se zyrtarët deportuan fëmijët nga Ukraina në Rusi ose në territoret e kontrolluara nga Rusia pa miratimin e fëmijëve. Në fakt ata i kanë gënjyer fëmijët se prindërit nuk i duan, duke i përdorur për qëllime propagandistike dhe duke u dhënë shtetësinë ruse.
Sipas Institutit për Studimin e Luftës, një institut me bazë në Uashington, zyrtarët rusë po zhvillojnë një fushatë të qëllimshme shpopullimi në pjesët e pushtuara të Ukrainës dhe deportimin e fëmijëve.
Autoritetet ruse kanë deklaruar vazhdimisht se qëllimi i transportimit të fëmijëve në Rusi është mbrojtja e tyre nga armiqësitë.
Ministria e Jashtme e Rusisë hodhi poshtë pretendimet se vendi po deporton fëmijët, duke vënë në dukje se autoritetet po kërkojnë të afërmit e fëmijëve të pashoqëruar në një përpjekje për t’i dërguar ata në shtëpi.
Avokatja e popullit rus për të drejtat e fëmijëve Maria Lvova Belova mbikëqyri personalisht transferimin e qindra jetimëve nga zonat e kontrolluara nga Rusia të Ukrainës për t’u birësuar nga familjet ruse.
Ai pretendoi se disa prej fëmijëve iu ofrua mundësia të ktheheshin në Ukrainë, por refuzuan. Megjithatë, deklarata e saj nuk mund të konfirmohej.
/abcnews.al
