Gjatë një interviste, Olena Zelenska ka detajuar vështirësitë e mbajtjes së familjes së saj të bashkuar ndërsa përballet me luftën në Ukrainë, sipas skynews.
Zonja e parë e Ukrainës tha se ajo dhe burri i saj Volodymyr Zelensky po përpiqen të sigurohen që dy fëmijët e tyre “të mos shqetësohen për ta.”
“Ndjej se po bëjmë gjënë e duhur. Detyra ime është t’i mbaj ata të sigurt”, tha ajo.
Por ajo tha se ndërsa intervista po zhvillohej, u dëgjuan sirenat e alarmit në Kiev. “Në këtë moment, djali im po del nga shkolla dhe po shkon në shtëpi. Dhe tani jam e shqetësuar nëse djali im do të kthehet në shtëpi i sigurt”, tha ajo.
E pyetur nëse presidenti rus Vladimir Putin ka ndërgjegje apo është “thjesht një përbindësh”, zonja Zelenska u përgjigj: “E dyta”.
Ajo tha se nuk ka asnjë mesazh për liderin rus, duke shpjeguar: “Unë do të tregohem shumë e sinqertë me ju. Nuk dua të flas drejtpërdrejt me të, kurrë. Nuk dua të jem në atë situatë”.
Zonja e parë e Ukrainës ndodhet në Mbretërinë e Bashkuar, ku është takuar me bashkëshorten e Mbretit Charles.
/abcnews.al
