Pas vendimit të Parlamentit holandez për të kërkuar pezullimin e udhëtimit pa viza me Shqipërinë, nuk ka njoftime që Komisioni Europian duhet të ndërmarrë një veprim të tillë, konfirmon zëdhënësja e KE Maja Koçijançiç për mediat.
E pyetur nga mediat ballkanase nëse situata ka ndryshuar pas votimit në Holandë për rivendosjen e vizave me shqipërinë, Koçijançiç deklaroi se pozita e Komisionit e shprehur nga zëdhënësja Natasha Bertaud të mërkurën, ka mbetur e njëjtë.
“Komisioni është i vetëdijshëm për mocionin e miratuar dje në Parlamentin holandez, por ekziston një procedurë specifike që është në fuqi, për mekanizmin e rivendosjes së vizave dhe deri më sot nuk kemi marrë asnjë njoftim, nga asnjë shtet anëtar, që kërkon që mekanizmi i rivendosjes së vizave të shkaktohet për çdo vend që përfiton nga udhëtimi pa viza “, deklaroi Bertaud më 17 prill.
Ajo shtoi se nëse Komisioni do të marrë një njoftim të tillë, do ta analizojë me kujdes, do ta vlerësojë atë dhe do të përcaktojë nëse veprimi është i nevojshëm, duke theksuar rolin kryesor që ky organ ka në proces.
Pothuajse nëntë vjet pas hyrjes në fuqi të liberalizimit të vizave për Shqipërinë, parlamenti holandez votoi më 16 prill për të pezulluar marrëveshjen, pas arrestimit të 64 anëtarëve të një rrjeti të krimit të organizuar shqipfolës që u zhvillua në katër shtete anëtare të BE, përfshirë Holandën, në fillim të muajit.
Të martën, qeveria holandeze lëshoi një deklaratë zyrtare lidhur me vendimin e parlamentit, duke siguruar që regjimi aktual i vizave do të mbetet i njëjtë për momentin.
Megjithatë, vendimi i parlamentit ka hapur tashmë polemika në të gjithë vendin. Pas këtij vendimi, çdo figurë relevante politike ka reaguar, përfshirë Presidentin Ilir Meta, kryeministrin Edi Rama dhe kreun e Partisë Demokratike Lulzim Basha. Ndërsa Kryeministri e kritikoi vendimin si pjesë e politikës së brendshme elektorale, Basha ia atribuoi atë mosbesimit në qeverinë socialiste./abcnews.al
