Dinamo do të masë forcat me Laçin për ndeshjen e javës së 20-të të kampionatit shqiptarë. Blutë e kryeqytetit pas eleminimit nga Kupa e Shqipërisë, ku u mposhtën në derbi nga Partizani, tani do të fokusohen 100% te Abissnet Superiore.
Humbja e fundit në kampionat kundër Kastiotit ishte shumë zhgënjyese për drejtuesit e Bluve, humbje që i ka përfshirë djemtë e Bledar Devollin në vorbullën e mbijetesës.
Në konferencën për shtyp, Devolli është shprehur se përballja me Laçin është shumë e vështirë duke marrë parasysh se kurbinasit janë ekipi më në formë i momentit në Abissnet Superiore.
“Normale që kjo situatë që po kalojmë është edhe pak psikologjike. Jemi këtu për të punuar në të gjitha drejtimet. Kemi përballë një kundërshtar të vështirë, që është me meritë në vend të dytë dhe besoj se do të jetë deri në fund pretendent për kampion. E kemi parë, sidomos këto ndeshjet e fundit, edhe pse nuk kanë luajtur mirë kanë fituar. Kjo tregon që janë rritur shumë si ekip.
Ne do të bëjmë punën tonë, i kemi marrë masat dhe do të luajmë vetëm për të fituar ndeshjen. Unë dua që ekipi të luajë siç dua unë, jo siç duan futbollistët. Sidomos në 20 metrat e fundit duhet të bëjmë ato gjërat që kam unë në kokë. Në qoftë se i bëjmë gjërat drejtë, edhe golat dhe rezultatet do vijnë që nga nesër”.
“Shpresojmë nesër të vijë kthesa e madhe që dëshirojmë. Kemi bërë goxha ndryshime. Unë dua njerëz që vrapojnë dhe luftojnë. Duhet të jemi agresivë, me besim. Kam shumë besim që nga nesër do të vijë kthesa e madhe që të gjithë presim”.
“Bardhi mbrojtës i majtë? Ashtu e menduam me stafin, sepse Maliki ka probleme me maskën. Siljanovski bëri mirë ndaj Partizanit dhe besoj do të jetë ai nga minuta e parë nesër. Shpresojmë t’i sistemojmë lojtarët në vendet e tyre. Kam besim që nesër do të jemi mirë me lojë dhe rezultat. Unë nuk kam frikë asnjë ekip, në qoftë se ne jemi në rregull, në qoftë se i bëjmë gjërat drejtë, nuk do të kemi probleme, me golin, rezultatet dhe lojën. Po prodhove lojë do të vijnë dhe rezultatet”, ka përfunduar tekniku gjirokastrit. /f.a/abcnews.al
