Gjatë takimit me gratë demokrate në Tiranë, kreu i Partisë Demokratike Lulzim Basha dha një mesazh në lidhje me përplasjet e brendshme në PD, duke theksuar se kanë vendosur të zgjedhin të ardhmen dhe e kanë kuptuar se këtë betejë nuk mund ta bëjnë vetëm për fatin e një njeriu.
“Nuk do kishte turp më të madh për burrat që të hedhin një hap pas. Vetëm për zonjat ia vlen ta bëjmë këtë betejë. Nuk e shpërfill dot gjuhën e urrejtjes ndaj grave. Iu them ndalni sa nuk jeni vonë. Iua them qetësisht por vendosmërisht. Ndaluni sa nuk jeni vonë. Harrojeni se jua fal gjuhën e urrejtjes ndaj grave demokrate. Nuk kam ndërmend të rikthehem. Çfarë kishim për të thënë e thamë. Mirë bën që thuhet prapë sepse është njëfarë terapie. Kur ndodh diçka e keqe më mirë ta nxjerrësh se ta mbash brenda. Dua ta vë theksin edhe njëherë tek ajo që kemi vendosur të gjithë bashkë. Kemi vendosur të zgjedhim të ardhmen.
E ardhmja lind përmes sakrificës. Jam i vendosur të jem në krahun tuaj dhe t’i prij kësaj sakrifice. E ardhmja që duan shqiptarët është që fëmijët e shqiptarëve të gjejnë të gjitha mundësitë pranë familjeve të tyre. Tani është koha për ndryshim. Për të ecur përpara drejt modelit të së ardhmes. E kemi para syve tanë. Janë nënat shqiptare. Së bashku nuk ka forcë që na pengon për ta bërë këtë mision realitet dhe të prekshëm për të gjithë shqiptarët, Sot jemi në zemër të Tiranës dhe pardje isha në Fier”, deklaroi Basha.
Basha tha se do të jetë cep më cep të Shqipërisë ndërsa shtoi se Shqipëria nesër do të bëhet ashtu si është PD sot.
“Pritje prekëse, qoftë me pjesëmarrjen dhe entuziazmin dhe kështu do jem cep më cep duke folur me të gjithë. Edhe me ata të zhgënjyerit që kanë edhe kritika. Do i dëgjojmë të gjithë ata që nuk e kanë humbur arsyen. Edhe ata që e kanë kuptuar që këtë betejë nuk mund ta bëjnë për fatin e një njeriu. Si është PD sot, do të jetë Shqipëria nesër dhe ku ju shoh kështu e di që Shqipëria nesër do të jetë e fortë dhe e bukur. Ky është mesazhi që marr unë me vete nga ky takim i mrekullueshëm”, tha Basha. m.v/abcnews.al
