E vetmja gjë që qëndron në këmbë, mes rrënojash edhe pas 6 muajsh në Thumanë, janë objekte të ndërtesave të shkatërruara, siç është edhe kjo derë që duket në foto.
Në rrënojat e pallateve të shembura në Thumanë, nga tërmeti i 26 nëntorit të 2019-të, në kujtim të atyre që humbën janë vendosur tufa lulesh.
6 muaj pas ngjarjes tragjike në lagjen ku u shembën tre pallate është rikthyer Preng Lala.
Mëngjesin e 26 nëntorit, Prenga ndodhej në Mamurras. Edhe ai si shumë të tjerë ishte zgjuar si pasojë e dridhjeve të tokës. U nis për në Thumanë. Dikush i tregoi se një grua ishte e bllokuar në nën rrënojat e pallatit. Ai mori përsipër rrezikun, e iu drejtua që ta ndihmonte, duke kërkuar ndihmën e qytetarëve të tjerë.
“I thashë një qytetari të më gjente një levë, në momentin që e mora çava murin. Kishte shumë rrezik, por një mundësi shpëtimi e shihja te shkallët e katit të dytë”, u shpreh ai.
Kjo foto është shkrepur në momentin që Prenga përpiqej të shpëtonte zonjën, e cila është gjallë fale ndërhyrjes se këtij tij.
“Janë momente shumë të vështira, sidomos kur sheh një njeri aty në gjendje të vështirë, duke vdekur. Thirrjet e saj ishin për ndihmë. Kishte frikë edhe për të bërë një gjilpërë për zemrën”, tregon ai.
Prenga gjithashtu tregon se i ka kërkuar ndihmë policisë shqiptare, por kishte mangësi të mjeteve, pavarësisht dëshirës për të ndihmuar.
“Nuk kishte shumë policë edhe dëshira për të ndihmuar ishte e madhe, por nuk kishin mjete. Më pas erdhën forcat greke dhe kosovare, të cilët ishin të pajisur me mjetet e duhura”, u shpreh ai.
Në kujtim të viktimave Prenga është lutur e ka ndezur një qiri. Tërmeti shkatërrimtar i 26 nëntorit i mori jetën në Thumanë 24 personave.
