Loading ...
Një rrugëtim që duket i pamundur për shumicën, por jo për Miridon Mulollin. Boksieri profesionist shqiptar, i njohur në Gjermani me nofkën “Kobra”, ka realizuar një sfidë të jashtëzakonshme duke përshkuar rreth 1.500 kilometra në këmbë nga qyteti Suhl i Gjermanisë deri në sheshin “Nënë Tereza” në Prishtinë.
Për 15 ditë me radhë, ai kaloi kufij shtetesh, sfidoi lodhjen ekstreme dhe vuri në provë çdo limit fizik e mendor. Udhëtimi i tij nisi në Gjermani, vazhdoi përmes Çekisë, Austrisë, Hungarisë dhe Serbisë, për të përfunduar mes emocioneve të mëdha në Kosovë.
“Momenti më i vështirë ishte pas 300 kilometrave të para. Trupi filloi të lodhej shumë, fillova të dridhesha dhe mendova se sfida po bëhej gjithnjë e më e rëndë. Por nuk e kam menduar asnjëherë ta ndërpres,” rrëfen Miridoni.
Natën e fundit ai fjeti vetëm dy orë. Më pas vazhdoi ecjen pa pushim për të arritur objektivin që i kishte vendosur vetes.
Gjatë këtij marshimi të jashtëzakonshëm, boksieri humbi mbi 10 kilogramë, por fitoi diçka shumë më të madhe: respektin dhe admirimin e mijëra njerëzve që ndoqën hap pas hapi aventurën e tij.
Gjithçka nisi nga një dëshirë e thjeshtë.
“I thashë babait se do të vija në shtëpi në këmbë. Në fillim mendoi se po bëja shaka, por kur mbërrita nuk i mbajti dot lotët,” tregon ai.
Përtej simbolikës së kthimit në atdhe, ky udhëtim ishte edhe një test i jashtëzakonshëm për karrierën sportive të Miridonit. Boksieri profesionist numëron aktualisht 10 fitore dhe vetëm 2 humbje në ring, ndërsa po përgatitet për sfidën më të madhe të karrierës së tij.
Më 29 gusht 2026, në qytetin Suhl të Gjermanisë, ai do të ngjitet në ring për të luftuar për titullin Kampion i Gjermanisë në boks. “Ky marshim më shërbeu si përgatitje fizike dhe mendore, por edhe si një mënyrë fantastike për të promovuar meçin e radhës. Tani fokusi është vetëm te titulli,” shprehet ai.
Historia e Miridon Mulollit nuk është vetëm historia e një sportisti. Është historia e një njeriu që refuzoi të dorëzohej përballë lodhjes, dhimbjes dhe kufijve të zakonshëm njerëzorë.
Nga Gjermania në Kosovë, hap pas hapi, ai dëshmoi se forca më e madhe nuk qëndron vetëm në grushtet e një boksieri, por në vullnetin për të mos u ndalur kurrë.
