Loading ...
Zoran Stankoviç është serbi i arrestuar një ditë më parë nga policia e Kosovës, drejtoria për Hetimin e Krimeve të Luftës.
Ai dyshohet se ka kryer krime lufte gjatë viteve 1998-1999.
Stankoviç është arrestuar në pikëkalimin kufitar të Merdares.
Prej kohësh ai ishte nën survejimin e autoriteteve të Kosovës dhe është kapur sapo ka kaluar kufirin.
Sipas Prokurorisë Speciale të Republikës së Kosovës, i pandehuri, si pjesë e një grupi paramilitar të forcave serbe, dyshohet se ka kryer krime lufte në fshatin Matiçan, Komuna e Prishtinës.
“Brenda afatit ligjor, sipas Kodit te Procedurës Penale, Prokuroria Speciale do të paraqesë në Gjykatën Themelore te Prishtinës, Departamenti Special kërkesën për paraburgim”, thuhet në njoftimin e Prokurorise.
Arrestimi i tij vjen pak ditë pasi një gjykatë në Prishtinë i dënoi me burgim dy ish-pjesëtarët të forcave policore dhe ushtarake të Serbisë për krime lufte në Kosovë.
Që nga përfundimi i luftës, dhjetëra të dyshuar janë dënuar për këto krime para institucioneve vendore dhe ndërkombëtare.
Pas luftës, nga viti 2000 deri në 2008, krimet e luftës në Kosovë u hetuan nga UNMIK, ndërsa nga viti 2008, nga Misioni i Bashkimit Evropian për Sundim të Ligjit (EULEX).
Më 2018, EULEX-i ia dorëzoi lëndët organeve vendore të drejtësisë.
