Loading ...
Një sulm me dron këtë të diel, 17 maj, ka shkaktuar zjarr në perimetrin e Centralit Bërthamor Barakah në Emiratet e Bashkuara Arabe (EBA), duke ngritur shqetësime të reja për një përshkallëzim të mundshëm rajonal, në një kohë kur armëpushimi mes Iranit dhe Shteteve të Bashkuara mbetet i brishtë.
Autoritetet në Abu Dhabi thanë se zjarri shpërtheu në një gjenerator elektrik jashtë perimetrit të brendshëm të centralit, në rajonin Al Dhafra. Nuk u raportuan viktima apo të lënduar, ndërsa zyrtarët deklaruan se nivelet e rrezatimit mbetën normale.
Rregullatori bërthamor i EBA-së bëri të ditur se operacionet në central, i pari impiant bërthamor në Gadishullin Arabik, nuk janë prekur. “Të gjitha njësitë po funksionojnë normalisht”, thuhej në një postim të publikuar në rrjetet sociale.
Deri tani askush nuk ka marrë përgjegjësinë për sulmin dhe Emiratet nuk kanë akuzuar publikisht asnjë shtet.
Disa orë pas zjarrit, Ministria e Mbrojtjes e EBA-së deklaroi se mbrojtja ajrore kishte neutralizuar me sukses dy dronë, ndërsa një i tretë goditi një gjenerator pranë centralit. Sipas autoriteteve, dronët ishin nisur nga “kufiri perëndimor”, pa dhënë detaje të tjera, ndërsa hetimet për burimin e sulmit vazhdojnë.
Agjencia Ndërkombëtare për Energjinë Atomike (IAEA) njoftoi se incidenti detyroi përkohësisht një nga reaktorët të mbështetej te gjeneratorët rezervë me naftë. Kreu i IAEA-s, Rafael Grossi, shprehu “shqetësim të madh”, duke paralajmëruar se aktivitetet ushtarake që rrezikojnë objektet bërthamore janë “të papranueshme”.
Centrali Barakah ndodhet pranë kufirit me Arabinë Saudite, rreth 225 kilometra në perëndim të Abu Dhabit.
Emiratet janë përballur vazhdimisht me sulme iraniane me raketa dhe dronë që kur SHBA-të dhe Izraeli nisën sulmet ndaj Iranit më 28 shkurt. Sulmet vazhduan edhe pas shpalljes së armëpushimit mes Washingtonit dhe Teheranit më 8 prill.
Katari dhe Arabia Saudite dënuan sulmin, duke e cilësuar atë si kërcënim për sigurinë dhe stabilitetin e të gjithë rajonit.
Javën e kaluar, autoritetet emirate akuzuan Iranin për sulme me raketa dhe dronë ndaj qytetit portual Fujairah, ku tre shtetas indianë mbetën të plagosur dhe shpërtheu zjarr në një objekt nafte në zonën industriale të Fujairahut.
Irani kishte paralajmëruar më herët se vendet që strehojnë baza ushtarake amerikane ose interesa të lidhura me Izraelin mund të shndërrohen në objektiva.
Së fundmi, Teherani akuzoi Emiratet për forcim të marrëdhënieve me Izraelin, ndërsa në media qarkulluan raportime se kryeministri izraelit Benjamin Netanyahu kishte zhvilluar një vizitë “sekrete” në shtetin e Gjirit gjatë konfliktit. Emiratet i mohuan këto pretendime.
Ambasadori amerikan në Izrael, Mike Huckabee, deklaroi javën e kaluar se Izraeli kishte vendosur sisteme të mbrojtjes ajrore Iron Dome dhe personel ushtarak në Emirate për të ndihmuar në mbrojtjen kundër sulmeve të mundshme iraniane.
Në një deklaratë të premten, Ministria e Jashtme e EBA-së hodhi poshtë atë që e quajti përpjekje të Iranit për të justifikuar sulmet ndaj territorit emiratas, duke theksuar se vendi rezervon të drejtën të reagojë ndaj çdo kërcënimi.
