Zinedine Zidane është padyshim një nga trajnerët më të suksesshëm në historinë e Real Madrid, por çdo nisje e ka një fund dhe e tij në “Santago Bernabeu” është drejt fundit.
Madrilenët janë në garë vetëm në La Liga tashmë, por jo çdo gjë është në dorën e tyre, çka do të thotë se ka shumë shanse që Reali ta mbyllë pa asnjë trofe këtë sezon.
Në këto kushte, Florentino Perez pritet ta mbyllë me teknikun francez i cili pak javë më parë thuri fjalë të mëdha për Juventusin dhe rikthimin në Torino, ku e vuri emrin për herë të parë mes më të mëdhenjve.
Tuttosport tregon se Juventus, që pritet të largoje Pirlon në fund të sezonit, është shumë i interesuar për Zidane dhe sheh me vëmendje zhvillimet në Madrid. Për t’u parë është paga prej 15 milionë eurosh bashkë me bonuset e trajnerit.
Gjithsesi, nëse Zidane lë Madridin, tezë për të cilën mundësitë janë të mëdha, Juventusi do ishte gati të sakrifikonte. E sigurtë është se bardhezinjtë në këtë moment janë më afër se kurrë me Zidane. /abcnews.al
