Deputetë të maxhorancës dhe ministrat e kabinetit janë larguar nga salla e Kuvendit, në shenjë proteste ndaj ofendimeve të deputetes Ina Zhupa në drejtim të socialistit Brace.
Grupi i deputetëve dhe ministrave të Partisë Socialiste kanë braktisur sallën e Kuvendit pasi demokratja Ina Zhupa replikoi me deputetin socialist, Erion Braçe dhe e quajti këtë të fundit si “‘kone’, ‘të ha m** goja’!”
Sapo Zhupa mori fjalën për interpelancë, ajo iu drejtua me fjalë fyese socialistit.
“Keni një problem të madh me gjatësinë, unë Nuk i dëgjoj ata nën 1 e 50 metra, nuk e di kush ta jep të drejtën të më quash ruse se unë nuk ia jap të drejtën vetes të të them ‘kone’ edhe pse të thonë të gjithë. Kemi një shprehje ne nga anët tona për fëmijët kur futen në çështje të të mëdhenjve, ne u themi ‘o Erion t’u rrittë boja sa shumë M të ha goja”, tha Zhupa.
Deputetët e maxhorancën kanë braktisur sallën e seancës plenare, ndërsa Zhupa mbante fjalën e saj gjatë interpelancës me Ministren e Arsimit, deputetët e maxhorancës janë larguar, ndërsa kryetarja e Kuvendit, Elisa Spiropali ka kërkuar nga deputetja demokrate të kërkojë ndjesë.
“Në emër të grupit të PS mbështetur në rregullore, në moral. Kërkoj që seanca të ndërpritet derisa deputetja të kërkojë ndjesë publike.” -tha kreu i grupit parlamentar të PS, Niko Peleshi .
Në kulmin e këtij debati, kryeparlamentarja Spiropali kërkoi ndjesë në emër të kuvendit të Shqipërisë, për gjuhën e përdorur nga deputetët në sallë, ndërsa ndërpreu punimet e seancës.
“E kërkoj unë faljen në emër të Kuvendit të Shqipërisë, për të gjithë deputetët, të gjitha ato që qytetarëve u kanë dëgjuar veshët, qofshin të djathtë qofshin të majtë, kushdo duhet të marrë dënim. Seanca ndërpritet, jemi në mes të një interepelance, ka nevojë që interpelanca të zhvillohet sipas rregullores. Po e ndërpres seancën për të marrë masat që kjo interpelencë të vijojë”- perfundoi Spiropali.
Por edhe pas ndërprerje për disa minuta me qëllimin rifillimin e saj, seanca u mbyll dhe kryeparlamentarja Spiropali njoftoi mbajtjen e saj në një ditë tjetër.
“Nuk i jemi shmangur ndonjëherë përgjegjësi për të qëndruar këtu me orë të tëra. Por sigurisht kur seanca cënohet seriozisht nga teatraliteti, nga dhuna e sforcuar nga gjuha e urrejtjes dhe e denigrimit dhe kur nuk ka më pika të rendit të ditës, sigurisht që seanca do mbyllet. Uroj të diskutojmë me më shumë përgjegjësi në seancën e radhës, ku do keni rast për të folur si për marrëveshjet edhe për ligjin e gjobave”. tha ajo.
