Qeveria gjermane thotë se po godet emigracionin e paligjishëm dhe krimin pas sulmeve të fundit ekstremiste dhe planet për të zgjeruar kontrollet e përkohshme kufitare në të nëntë kufijtë e saj javën e ardhshme.
Muajin e kaluar, një sulm vdekjeprurës me thikë nga një azilkërkues sirian në Soligen shkaktoi 3 viktima. Autori pretendoi se ishte i frymëzuar nga grupi i Shtetit Islamik.
Në qershor, një sulm me thikë nga një emigrant afgan la të vdekur një oficer policie dhe katër persona të tjerë të plagosur.
Mbyllja e kufijve është caktuar të zgjasë gjashtë muaj dhe po kërcënon të testojë unitetin.
“Bëhet fjalë për zbatimin e ligjit, për veprimet aktuale dhe zbatimin e masave nga policia federale që ndodhin në kufi dhe në zona afër kufijve.
Mbi të gjitha, kjo është një çështje e zbatimit të ligjit brenda kornizës së ligjit europian në fuqi, në kuadrin e legjislacionit kombëtar në fuqi dhe, mbi të gjitha, ka të bëjë me rastet në të cilat shtetet e tjera anëtare të BE-së janë përgjegjëse për procedurën e azilit.
Këto raste duhet të shqyrtohen shumë shpejt, të procedohen shumë shpejt dhe më pas t’i kthehen drejtpërdrejt shtetit anëtar të BE-së përgjegjës për procedurën e azilit”, tha Maximilian Kall, zëdhënës i Ministrisë së Brendshme.
Shumica e fqinjëve të Gjermanisë janë anëtarë të Bashkimit Europian, një bllok prej 27 vendesh i bazuar në parimet e tregtisë së lirë dhe të udhëtimit.
Dhe Gjermania, motori ekonomik i BE-së në zemër të Europës ndan më shumë kufij me vendet e tjera se çdo shtet tjetër anëtar.
Kryeministri polak të martën denoncoi mbylljet si “të papranueshme” dhe Austria tha se nuk do të pranojë emigrantët që Gjermania do të kthejë.
“Nuk mund t’i detyrosh njerëzit dhe të thuash se ke hyrë nëpërmjet Polonisë, kështu që Polonia është në fakt përgjegjëse për ty. Nuk mund t’u thuash në kufi se fjalën azil duhet ta thuash atje dhe jo këtu.
Kjo do të ishte e dëshirueshme nga pikëpamja gjermane. Pra, ne jemi në këtë situatë komplekse. Kjo do të thotë Shengen, kontrolle kufitare për një periudhë të caktuar kohore, po, më shumë presion mbi vendet fqinje për të bërë më shumë në sistemin e Dublinit, po, por kjo nuk do të thotë se ne me të vërtetë kemi rregulla të qarta ligjore për largimin e njerëzve në kufi. nëse duan të aplikojnë për azil”, tha për AP Raphael Bossong nga Instituti Gjerman për Çështjet Ndërkombëtare dhe të Sigurisë.
“Shpresa ime ishte që vendosja e kontrolleve kufitare dhe refuzimet e vazhdueshme në këtë kufi do të shkaktonte të ashtuquajturin efekt domino, përkatësisht që vendet tona fqinje të kontrollonin kufijtë e tyre. Më pas, në një të ardhme të parashikueshme, fluksi në kufi do të ishte më i vogël dhe mund të reduktojmë forcat edhe me masat që propozohen tani.
Me masat e propozuara nga qeveria do të ndodhë pikërisht e kundërta. Nuk do të shohim një rënie, por një fluks që do të bëhet edhe më i theksuar sepse askush nuk do të regjistrohet në asnjë kufi brenda Bashkimit Europian.
Kjo do të thotë se do të kemi më shumë njerëz të paregjistruar në kufijtë e brendshëm të Gjermanisë se më parë. Dhe atëherë i gjithë ky sistem do të kthehej në absurditet”, tha Heiko Teggatz, kreu i Sindikatës së Policisë Gjermane.
Sllovenia, Austria dhe Italia gjithashtu kanë zgjeruar kontrollet e përkohshme kufitare në disa zona ose në të gjithë kufijtë e tyre.
/abcnews.al
