Nga Calin Aneculaesei, History of Yesterday
Përktheu: Sonila Backa-abcnews.al
Për shumë prej nesh që kemi fatin të jetojmë në demokraci, procesi i votimit është bërë pjesë e një cikli disavjeçar që të gjithë do ta kalojmë. Procesi demokratik i votimit është përsosur gjatë historisë për të dhënë atë që shumë do ta cilësonin si vendimin më të drejtë që popullsia e një kombi mund të arrijë duke marrë parasysh vendimin e çdo personi.
Si gjithmonë, asgjë nuk është perfekte, dhe manipulimet gjatë zgjedhjeve dhe falsifikimi i votave janë raportuar në vendet ku demokracia është pak më shumë se një parodi për të fituar legjitimitetin e qeverisë në sytë e popullit të saj.
Kjo zakonisht bëhet në mënyrë të kujdesshme për të mos ngritur dyshime, por ndonjëherë ky mashtrim bëhet në një shkallë të tillë që edhe ata që janë të verbuar nga prestigji i vendit të tyre mund të fillojnë të dyshojnë, raporton abcnews.al.
E tillë ishte situata në vitin 1927 në Liberi.
Liberia ishte një koloni amerikane, e cila u formua fillimisht për skllevërit amerikanë pasi mendohej se ata kishin një shans më të mirë për të qënë të lirë në Afrikë sesa në Amerikë.
Kolonia shpalli pavarësinë e saj në 1847, megjithëse nuk u njoh zyrtarisht si e pavarur nga Shtetet e Bashkuara derisa Konfederata u nda nga SHBA-ja.
Pas fundit të luftës civile, Liberia vazhdoi të kishte marrëdhënie të ngushta me SHBA-në, si në Luftën e Parë Botërore, ku i shpalli luftë Gjermanisë vetëm 5 muaj pas Shteteve të Bashkuara të Amerikës.
Vendi do të vazhdonte gjithashtu të ishte një nga anëtarët themelues të Lidhjes së Kombeve, paraardhësi i Organizatës së Kombeve të Bashkuara, i krijuar pas Luftës së Parë Botërore, me synimin për të ndaluar që një tjetër luftë të mos ndodhte më në Europë.
Demokracia e pasluftës
Nëntë vite pas luftës, Liberia mbajti zgjedhjet. Partia, True Whig Party, përfaqësohej nga Charles DB King, i cili kishte shërbyer tashmë dy mandate si kreu i vendit deri në vitin 1927.
King u përball me Thomas J. Faulkner, i cili përfaqësonte Partinë Popullore gjatë zgjedhjeve. Në vitin 1927 kishte vetëm 15,000 votues të regjistruar në Liberi. Nga shifrat përfundimtare të votimit mund të konkludojmë se King e kuptoi se i mungonte mbështetja për të fituar zgjedhjet legalisht, raporton abcnews.al.
Duke parë votimin përfundimtar, 9,000 njerëz votuan për opozitën, praktikisht për Thomas Faulkner. Është e pamundur që ato 9,000 vota të jenë falsifikuar për shkak të fitores dërrmuese që mbreti mori.
Pas numërimit, King dhe Partia e tij True Whig morën 243,000 vota, një vlerë më shumë se 15 herë më e madhe se numri i votuesve të regjistruar në të gjithë Liberinë.
Për shkak të përmasave të manipulimeve në këto zgjedhje, ngjarja mori një çmim në Librin e Rekordeve Botërore Guinness si zgjedhjet më të manipuluara ndonjëherë në histori.
Ngjarjet si këto zgjedhje na tregojnë se njerëzit do të bëjnë gjithçka për pushtet, sado absurde të duket si ide. Ne jetojmë ende në një botë ku zgjedhjet ndikohen në mënyra që shumë mund t’i cilësojnë si jodemokratike.
I takon votuesve të korrigjojnë gabimet pasi votuesi në fund të fundit ka të gjithë pushtetin në një sistem të tillë.
Ndryshe nga paraardhësit tanë që jetuan nën një sistem feudal, ne kemi aftësinë të ndikojmë në drejtimin e vendit tonë. Pjesëmarrja në procesin demokratik duhet parë më shumë si një privilegj dhe detyrë për qytetarët e çdo vendi sesa si një barrë.
Përgjegjësia e një personi, një ditë në çdo katër, pesë ose gjashtë vite mund të ndryshojë rrjedhën e historisë.
/abcnews.al
