Loading ...11 maji u vulos. Me tre vota pro dhe dy kundër, Komisioni Rregullator shpalli këtë të enjte rezultatin përfundimtar të zgjedhjeve, tre muaj e gjysmë nga zhvillimi i tyre, pas një sage të gjatë ankimimesh dhe kontestimesh.
Kështu, për Partinë Socialiste u certifikuan 83 mandate, Partinë Demokratike – Aleanca për Shqipërinë Madhështore me 50 mandate, PSD me 3 mandate, Mundësia me 2 mandate, Lëvizja Bashkë dhe Shqipëria Bëhet me nga 1 mandat.
Dhe në këtë mbledhje, anëtarët e propozuar nga PD nuk hoqën dorë nga pretendimet për farsë elektorale. Dhe pse në të gjitha hallkat ligjore janë rrëzuar argumentat e tyre.
Pas vendimit të kësaj të enjteje, partitë politike kanë kohe 5 ditë për ta ankimuar në kolegjin zgjedhor por burime thanë se PD nuk do e ndërrmarrë një lëvizje të tillë. Në këto kushte, i hapet rruga presidentit Bajram Begaj për të thirrur seancën e parë të legjislaturës së 11 të kuvendit. 10 shtatori është data e parë se kur Begaj mund të thërrasë parlamentin, ndërsa afati fundor është 20 shtatori.
NDARJA E MANDATEVE
Partia Socialiste – 83 mandate
PD-Aleanca për Shqipërinë Madhështore – 50 mandate
Partia Social Demokrate – 3 mandate
Partia Mundësia – 2 mandate
Lëvizja Bashkë – 1 mandat
Nisma Shqipëria Bëhet – 1 mandat
