Presidenti ukrainas Volodymyr Zelensky ka ftuar kancelarin gjerman Olaf Scholz dhe presidentin gjerman Frank-Walter Steinmeier në një takim zyrtar në Kiev, ka njoftuar zyra e presidentit gjerman, sipas agjencisë së lajmeve AFP.
BBC shkruan se Zelensky e bëri ftesën gjatë një bisede telefonike më presidentin gjerman.
Lexo edhe:Zelensky hap faqen globale të financimit për të ndihmuar Ukrainën: Bashkë mund të ndalim luftën
Presidenti ukrainas tha se gjatë telefonatës ai diskutoi dhe sqaroi me homologun e tij mosmarrëveshjet e të kaluarës midis dy vendeve. Ndërkohë Steinmeier shprehu “solidaritetin, respektin dhe mbështetjen” e tij për Ukrainën.
Ftesa vjen tre javë pasi Steinmeier u refuzua nga Kievi për shkak të lidhjeve të ngushta ekonomike të Gjermanisë me Rusinë . Vizita e planifikuar e presidentit gjerman në kryeqytetin ukrainas u anulua në minutën e fundit.
Çfarë ka ndodhur sot në Ukrainë?
• Ndërsa sulmet ruse në fabrikën e çelikut Azovstal në Mariupol intensifikohen, rreth 200 civilë mendohet se mbeten të bllokuar brenda uzinës
• Rusia është akuzuar për pengimin e përpjekjeve për të evakuuar civilët nga fabrika e çelikut Azovstal, të cilën Kremlini e mohon, pasi u zotua të ndalonte sulmet e saj për të lehtësuar hapjen e korridoreve humanitare.
• Të evakuuarit që u larguan nga fabrika kanë përshkruar se nuk ishin në gjendje të shihnin dritën e ditës ose të merrnin ajër të pastër për ditë të tëra ndërsa kishin ngecur poshtë fabrikës së çelikut
• Presidenti ukrainas Volodymyr Zelensky tha se rreth 344 të evakuuar nga qyteti i Mariupolit dhe rrethinat e tij kishin mbërritur në Zaporizhzhia.
• Donatorët ndërkombëtarë kanë premtuar 6.5 miliardë dollarë për të mbështetur Ukrainën gjatë një konference në kryeqytetin polak Varshavë.
• Kremlini ka thënë se ishte i vetëdijshëm se SHBA, Britania e Madhe dhe vende të tjera të NATO-s po ushqenin vazhdimisht inteligjencën për ushtrinë ukrainase.
• Rusia thotë se forcat e saj kanë praktikuar sulme të simuluara raketore me aftësi bërthamore në enklavën e Kaliningradit të Detit Baltik, e vendosur midis anëtarëve të BE-së, Polonisë dhe Lituanisë.
• Ukraina nuk ka gjasa të nisë një kundërsulm kundër Rusisë përpara mesit të qershorit, kur shpreson të ketë marrë më shumë armë nga aleatët e saj.
/abcnews.al/
