Presidenti ukrainas Volodymyr Zelenskiy ka falënderuar Gjermaninë për mbështetjen e saj teksa u takua me Presidentin Frank-Walter Steinmeier të dielën në vizitën e tij të parë në vend që nga pushtimi i Rusisë.
Zelensky fluturoi me një avion qeverisë gjermane i shoqëruar nga avionët luftarakë të forcave ajrore Luftwaffe.
“Në periudhën më sfiduese në historinë moderne të Ukrainës, Gjermania është krenare që është miku ynë i vërtetë dhe aleati ynë i besueshëm. Së bashku do të fitojmë dhe do të kthejmë paqen në Europë,” theksoi presidenti ukrainas.
Zelensky pritet të takohet gjatë ditës me kancelarin gjerman Olaf Scholz dhe kabinetin e tij të sigurisë përpara se të udhëtojë në Aachen në Gjermaninë perëndimore për të marrë çmimin prestigjioz Charlemagne për nder të shërbimeve në Europë.
Gjermania, e cila është ekonomia më e madhe e Europës, u përball me kritika në fillim të luftës për atë që disa e quajtën një përgjigje hezituese, por ajo është bërë një nga ofruesit më të mëdhenj të ndihmës financiare dhe ushtarake të Ukrainës.
Të shtunën, qeveria gjermane njoftoi 2.7 miliardë euro ndihmë ushtarake për Ukrainën, paketa e saj më e madhe që kur Rusia pushtoi Ukrainën në shkurt të vitit të kaluar. Udhëheqësit e vendit u zotuan të mbështesin Kievin për aq kohë sa do të ishte e nevojshme.
Zelensky e cilësoi këtë si një “paketë të fuqishme” në një postim në Twitter, duke treguar se ai synonte të diskutonte furnizimin me armë, si dhe mbrojtjen ajrore, rindërtimin, kandidaturën e Ukrainës për anëtarësim në Bashkimin Europian dhe sigurinë me zyrtarët gjermanë.
Zelensky vizitoi për herë të fundit Gjermaninë për Këshillin e Sigurimit të Mynihut në shkurt të vitit të kaluar pak para se të shpërthente lufta. Gjermania ishte e kufizuar në mbështetjen e saj për Ukrainën në atë kohë si nga varësia e saj energjetike nga Rusia ashtu edhe nga një pacifizëm i rrënjosur në historinë e saj të përgjakshme të shekullit të 20-të.
Kjo kërkonte një përmbysje të madhe politike dhe një ndryshim në mentalitetin që Scholz e quajti një “Zeitenëende” ose një kthesë e epokës, në një fjalim historik vetëm disa ditë pasi shpërtheu lufta.
/abcnews.al
