Ditën e djeshme në Janinë u arrestua i shumëkërkuari i policisë shqiptare, Laert Haxhia dhe bashkë me të u shoqëruan edhe dy person të tjerë.
Gjatë verifikimeve mes Policisë greke dhe asaj shqiptare, ka rezultuar se njëri prej ktyre shtetasve, konkretisht shtetasi Firdues Berberi, ishte i shpallur në kërkim për plagosje në vitin 2022.
Çfarë ndodhi në vitin 2022?
Konflikti i viteve më parë mes familjes Berberi dhe asaj Muçllari, u bë shkak i plagosjes me armë zjarri dhe me thikë i të riut Joan Muçllari në Pogradec.
Joan Muçllari u qëllua nga dy të rinjtë, Firdeus Berberi dhe Greis Maxhari.
Ngjarja e ka fillesat, kur babai i Firdeus Berberit, Ilir Berberi i njohur dhe si “Lili i Rrushkës” u akuzua se qëlloi me armë kallashnikov në drejtim të hotelit “Voloreka” në pronësi të babait të Joanit, Jetmir Muçllarit, në pikun e sezonit turistik, por që fatmirësisht nuk pati të lënduar.
Disa ditë më pas Ilir Berberi dhe Ilir Meçollin 22 vjeç, Ardian Xhutin 29 vjeç e Elvir Haxhian 32 vjeç u arrestuan nga policia.
Njoftimi i policisë:
Policia e Shtetit
Një tjetër shtetas i shpallur në kërkim, vihet në pranga në kuadër të operacionit policor ndërkombëtar të koduar “Eksponenti”.
Qendronte ilegalisht në Janinë dhe shoqërohej me të shumëkërkuarin Laert Haxhiu, vihet në pranga 22-vjeçari.
Gjatë operacionit ndërkombëtar të koduar “Eksponenti”, të finalizuar falë informacioneve të siguruara nga Policia e Shtetit dhe shkëmbimit të tyre në kohë reale, ndërmjet Interpol Tiranës dhe Interpol Athinës, u lokalizua në Janinë, u kap dhe u arrestua me qëllim ekstradimin, i shumëkërkuari Laert Haxhiu, bashkë me të cilin janë shoqëruar në Policinë e Janinës, edhe 2 shtetas të tjerë shqiptarë që shoqëronin shtetasin e shumëkërkuar.
Nga verifikimet e kryera ndërmjet Policisë greke dhe Policisë shqiptare, ka rezultuar se njëri prej këtyre shtetasve, konkretisht shtetasi Firdeuss Berberi, 22 vjeç, lindur në Pogradec, ishte i shpallur në kërkim kombëtar nga Drejtoria Vendore e Policisë Korçë.
Gjykata e Rrethit Gjyqësor Pogradec ka caktuar ndaj 22-vjeçarit, masën e sigurisë “Arrest në burg”, në mungesë, për veprën penale “Plagosja e rëndë me dashje”, pasi më 25 prill të vitit 2022, dyshohet se në bashkëpunim me një shtetas tjetër, shtetasi Firdeus Berberi, ka plagosur rëndë, me armë zjarri pistoletë nje shtetasin, Joan Muçllari.
Policia e Shtetit në bashkëpunim me Ministrinë e Drejtësisë dhe me Prokurorinë e Përgjithshme, ka nisur procedurat për shpalljen në kërkim ndërkombëtar dhe ekstradimin e këtij shtetasi drejt Shqipërisë. r.t/abcnews.al
