Ministrja e Mbrojtjes Olta Xhaçka, në një deklaratë për mediat pasditen e sotme, bëri një panoramë të situatës së krijuar nga shirat dhe përmbytjet në Tiranë dhe disa qarqe të tjera të goditura nga moti i keq.
Deklarat e plotë e ministres Xhaçka
Dua t’ju informoj shkurtimisht mbi situatën e krijuar si pasojë e stuhisë që përfshiu dje disa qarqe e bashki të vendit.
Ka qenë një natë me reshje të një intensiteti të pazakontë, ku në një periudhë prej disa orësh ka rënë një sasi shiu e barabartë me mesataren mujore apo edhe disa mujore dhe që ka prekur veçanërisht Tiranën, Kamzën, Lezhën, Lacin apo Fushë Krujën.
Fatmirësisht, edhe pse infrastruktura, sidomos kanalizimet e kolektorët, e kanë pasur të vështirë të përballojnë fluksin e jashtëzakonshëm të ujit në momentet e para, aktualisht situata paraqitet e stabilizuar dhe pa probleme, me përjashtim të disa zonave të izoluara, të cilat janë asistuar e po asistohen tani që flasim, nga autoritetet vendore të mbështetura nga shtabet e emergjencave, ekipet e infrastrukturës dhe Forcat e Armatosura.
Dje, me shirat e rrëmbyeshëm ne kemi pasur mundësinë të testojmë sërish mekanizmin e ri të Mbrojtjes Civile i cili e ka çuar koordinimin mes institucioneve në një nivel të ri. Pra, ka pasur një organizim e koordinim mes Emergjencave në Ministrinë e Mbrojtjes, prefekturave dhe njësive të qeverisjes vendore, që ka funksionuar dhe që na ka lejuar ta adresojmë situatën e krijuar me shumë më tepër efikasitet, sesa në raste të ngjashme në të shkuarën.
Falë këtij angazhimi është bërë e mundur që përgjithësisht akset rrugore dhe sistemet kryesore të furnizimit të popullsisë me energji dhe ujë të pijshëm të jenë funksionale. OSHEE ka punuar gjatë natës dhe orëve të para të ditës së sotme, për të adresuar problematikat e krijuara nga dëmtimi i disa shtyllave apo prania e ujit në disa nënstacione. Pranë banorëve të prekur që në momentet e para janë paraqitur stafet e bashkive ndërsa bluzat e bardha, sikundër gjatë këtyre ditëve me një punë të admirueshme vazhdojnë të qëndrojnë në gatishmëri për çdo nevojë të mundshme.
Sipas informacioneve që përditësohen orë pas ore, nëqarkun e Tiranës,në 105 banesa ka prezencë uji dhe vështirësi ka pasur në Bashkinë e Kamzë, kryesisht në rrugët e brendshme. Dhjetra efektivë të Forcave tëArmatosura janë angazhuar që prej orëve të para të natës e vazhdojnë të qëndrojnë pranë banorëve, ndërsa rreth 400 efektivë të tjerë bashkë me mjete janë në gjendje gatishmërie.
Sipas raportimeve, ekipet në terren nuk kanë nevojë për kapacitete e mbështetje shtesë dhe situata pritet të normalizohet plotësisht.
Në Fushë Krujë kemi pasur situatën ndoshta më problematike, për shkak se zona të ndryshme të kësaj njësie administrative funksionojnë edhe si ujëmbledhës për zona të tjera të Tiranës. Pra,është vënë re prani e shtuar të ujit, jo vetëm nga reshjet, por edhe nga vërshimi i ujërave nga zonat me reliev më të lartë.
Aktualisht raportohet për 10 familje në fshatin Larush dhe 8 familje në njësinë administrative Bubq në banesat e të cilave ka prani uji. Në fshatrat Bilaj, Murqine dhe Mallkuc, lumi Ishëm doli nga shtrati dhe ka përmbytur toka bujqësore, duke rrezikuar edhe shtëpitë e ndërtuara pranë lumit.
Në bashkinë Lezhë, aktualisht situata është e normalizuar pas rritjes së nivelit të ujit mbrëmjen e djeshme në lagjen “Beslidhja”.
Në Bashkinë Kurbin situata ishte më problematike, pasi reshjet me intensitet të lartë bënë që të dalin ujërat e përroit në qendër të Laçit. Rritja e nivelit të ujërave mbi kapacitetin e përcjelljes së kolektorit Laç-Milot, bëri që të përmbyten disa banesa të ish-kombinatit të drurit dhe evakuimin e një familjeje. Ka rreth 350 ha tokë nën ujë.
Në Qarkun Shkodër, pavarësisht reshjeve të dendura, sipas raportimeve nga 5 bashkitë nuk ka probleme.
Pra, situata e përgjithshme mund të thuhet se është nën kontroll dhe problemet e shkaktuara nga reshjet dje janë të kufizuara qoftë gjeografikisht, qoftë në përmasa e shkallë.
Sigurisht, që jemi duke monitoruar lumenjtë kryesorë të këtyre zonave, duke filluar nga Erzeni e Ishmi, por për momentin nuk ka arsye për t’u shqetësuar edhe duke pasur parasysh faktin, që sipas parashikimeve të meteorologëve intensiteti i reshjeve po vjen në zbritje.
E di që pas një nate, si ajo që kaloi Tirana dhe Durrësi në fundjavë, është shkaktuar një lloj shqetësimi tek qytetarët edhe në formën e një stresi posttraumatik. Por dua t’i garantoj që situata është tërësisht e tejkaluar, të paktën situata e reshjeve mbrëmë dhe që çdo hallkë e shtetit dhe të vazhdojë të funksionojë me gatishmëri dhe përkushtim të plotë.
Reshje të tilla janë tashmë një realitet, janë pasoja e prekshme e ndryshimeve klimatike, por edhe e dëmeve që i kemi bërë qoftë natyrës, qoftë infrastrukturës gjatë dekadave të fundit. Por, ne tanimë kemi edhe më shumë eksperiencë për t’i përballuar dhe për t’i adresuar më mirë këto problematika, që vijnë si pasojë e këtyre reshjeve apo dukurive të natyrës por kemi edhe shumë më tepër kapacitete nga ëç’kemi patur më përpara për t’i përballuar me sukses adresimin e tyre.
I gjithë shteti është në krye të detyrës, që nga bashkitë e prefekturat, Forcat e Armatosura, Emergjencat Civile, policia, stafet mjekësore apo ekip./ABC News Albania 24/7
