Në një intervistë ekskluzive për TV Klan, Presidenti serb Aleksandër Vuçiç vlerëson se tashmë marrëdhëniet dypalëshe me Shqipërinë janë më të mira se më parë. Ndërsa në lidhje me Kosovën, Vuçiç deklaroi se duhet të tolerojnë të dyja palët si Kosova ashtu edhe Serbia.
Marrëdhëniet mes Shqipërisë dhe Serbisë kanë njohur progres, duke u bërë më normale në krahasim me të shkuarën. Komenti vjen nga Presidenti i Serbisë Aleksandër Vuçiç, në një intervistë ekskluzive për TV Klan.
“Së pari Serbia dhe Shqipëria sot kanë marrëdhënie më të mira se sa i kanë patur më parë dhe për këtë është meritor kryeministri shqiptar Edi Rama. Këtë nuk e kam penguar as unë dhe nëse asgjë tjetër pas shumë dekadash në të cilat nuk kemi patur kurrëfarë marrëdhëniesh mendoj se kemi vendosur marrëdhënie racionale dhe normale edhe pse nuk do ti vlerësoja si të jashtëzakonshme”.
Kur u pyet për Kosovën, Presidenti Vuçiç nënvizoi se e vetmja rrugë është që të dyja palët duhet të kuptojnë se duhet të lëshojnë diçka.
“Ajo që e kërkojnë shqiptarët është përkufizim vetëm se ata kërkojnë njëqind përqind të territorit të Kosovës. Pse do të mendonit ju se përkufizimi me 100 për qind të territorit të Kosovës më i drejt dhe më e mirë se sa me 90 përqind apo me 50 apo 30 përqind. Këtu shtrohet pyetja nëse mundemi ne të dyja palët apo ne dhe Prishtina të gjejmë dicka racionale reale dhe që do të thoshte humbje për të dyja palët dhe kur është humbje për të dyja palët kjo është minimumi i kënaqshëm edhe për njërën edhe palën tjetër”.
Kreu i shtetit serb pranoi se ka biseduar për Kosovën edhe me kryeministrin Rama.
“Me kryeministrin Edi Rama kam folur disa herë. A kemi folur ne thellësisht për çështjen e Kosovës? Jo në ketë mënyrë. A jam i gatshëm të flas me të gjithë për cështjen shqiptare dhe cështjen serbe, unë jam i gatshëm dhe këtu nuk shoh asgjë të keqe dhe asgjë të gabueshme. Kreun e qeverisë tuaj e respektoj shumë dhe ai ka ardhur në Beograd edhe pse në fakt takimet kanë qenë disi ashtu…ai ka dashur që këtu të fitoj pikë politike ndoshta dhe unë ia kam kthyer në mënyrë të njëjtë në Tiranë shpresoj, por marrëdhëniet tona sot janë tjera. Është bërë e zakonshme të shihemi dhe besoj se mund të kemi biseda shumë më të qeta dhe në besim të mirë. Dhe, besoj se kemi dicka më shumë besim tek njëri-tjetri”.
Sa i përket arrestimit të shefit të zyrës për Kosovën në qeverinë serbe, Marko Gjuriç, Vuçiç akuzoi Prishtinën se nuk i qëndroi fjalës.
“E dini ne kemi qenë të premtën në mbremje në të dy anët e tavolinës, Thaçi, Çollaku, Gjuriç dhe unë. Marko të premtën ka dorëzuar kërkesën për vizitë në Kosovë. Ata kanë organizuar sulm ndaj Markos të hënën. Kjo nuk bëhet”.
Presidenti Vuçiç u ndal edhe te vrasja e Oliver Ivanoviçit, duke refuzuar të thotë nëse ajo ka qenë e motivuar etnikisht. Ky është një rast ku dialogu mes nesh ka ndikuar shumë, tha Vuçiç./abcnews.al
