Loading ...
Kreu i Marinës së Gardës Revolucionare Iraniane, Komodori Alireza Tangsiri, është vrarë në sulmet izraelite.
Ministri i Mbrojtjes i Izraelit, Israel Katz, tha se Tangsiri ishte vrarë së bashku me komandantë të tjerë të lartë detarë.
Katz tha se Tangsiri ishte përgjegjës për operacionet e bombardimit që kanë bllokuar anijet nga kalimi i Ngushticës së Hormuzit.
Izraeli ka kryer një tjetër valë sulmesh ndaj Iranit gjatë natës dhe këtë të enjte. Sulme të rënda u raportuan në qytetin iranian të Isfahan. Atje ndodhet një bazë e madhe ajrore iraniane dhe vende të tjera ushtarake, si dhe një nga vendet bërthamore të bombarduara nga Shtetet e Bashkuara në qershor 2025.
Sirena u dëgjuan edhe në pjesë të Tel Avivit dhe qyteteve në Izraelin qendror. Këtë herë nuk kishte paralajmërim paraprak, siç është bërë zakonisht nga sulmet e raketave iraniane, gjë që tregon se ishte një goditje nga Hezbollahu në Liban.
Ndërkohë sulmet nga raketat iraniane kanë plagosur gjithashtu pesë persona në Kfar Qasim të Izraelit qendror, teksa sirena alarmi u dëgjuan edhe në Jeruzalem.
Sulme pati edhe në vendet e rajonit. Të paktën dy persona u vranë dhe tre u plagosën nga mbetjete e një rakete iraniane të rrëzuar në Abu Dhabi.
Emiratet e Bashkuara Arabe dhe Arabia Saudite rrëzuan gjithashtu dronë të shumtë që u nisën nga Irani.
Ministria e Mbrojtjes e Arabisë Saudite tha se të enjten në mëngjes rrëzoi disa dronë mbi Provincën e saj Lindore të pasur me naftë.
Kuvajti dhe Bahreini u përballën gjithashtu me sulmet iraniane të enjten në mëngjes.
Në Liban, Agjencia Kombëtare e Lajmeve raportoi për viktima dhe të plagosur nga sulmet izraelite në Harouf, në Libanin jugor.
Përveç sulmeve ajrore, ushtria izraelite është futur më thellë në territorin libanez si pjesë e një pushtimi tokësor që Izraeli thotë se synon të shkatërrojë grupin militant Hezbollah.
