Detaje të reja janë zbuluar për vrasjen makabre të 37-vjeçares shqiptare, Brunilda Kovaçi, në Mugins në afërsi të Kanës në Francë. Mediat franceze kanë bërë me dije se e ëma e një djali të mitur u gjet gjysmë e zhveshur natën e Krishtlindjes në një park të qytetit dhe trupi i saj ishte pjesërisht i djegur.
Duke cituar prokurorinë franceze, mediat shkruajnë se shqiptarja ushtronte prostitucion në këtë zonë dhe nga hetimet e para mësohet se autor i krimit të rëndë ka qenë një nga klientët e saj.
Nga ana tjetër policia franceze ka arrestuar një 28-vjeçar shqiptar si të dyshuar për krimin. Ai u ka rrëfyer hetuesve se e ka mbytur 37-vjeçaren pas një sherri që kishin pasur në makinën e tij.
Prokurori francez Fabienne Atzori tha se pas krimit i riu ka tentuar të zhdukë trupin duke e dërguar në një park ku edhe ka tentuar ta djegë atë. Sipas tij motivi i krimit mbetet i paqartë, por besohet se motivet janë të dobëta.
Prokurori shtoi se shqiptarja kishte denoncuar edhe një tjetër rast dhune në vitin 2015, ndërsa u identifikua nga 2 tatuazhe në trupin e saj./abcnews.al
