Mediat në Greqi kanë publikuar foton e komandantit që iu gjetën 320 mijë euro në një kasafortë pas goditjes së një grupi kriminal që helenizonte shtetas të huaj, përfshirë këtu edhe shqiptarë. Emri i tij, ashtu si në rastin e efektivëve të tjerë të policisë të përfshirë nuk është bërë i ditur por fotoja e tij është publikuar.
Sipas raportimeve, grupi kriminal ra në rrjetën e autoriteteve pas vrasjes së një 37-vjeçari shqiptar në nëntor.
Shqiptari i cili mbeti viktimë i një sulmi mafioz në Atikë, kishte dokumente false. Dhe, sipas informacioneve, ai ishte në kërkim me emrin e tij të vërtetë shqiptar dhe përmes dokumenteve false që kishte siguruar, e paraqiste veten si qytetar grek me emrin Stergios Maznevidis.
Por më 16 nëntor një sulm i armatosur ndodhi në një pikë karburanti dhe ai mbeti viktimë. Sesi kjo vrasje është e lidhur me personat që janë arrestuar ditën e djeshme në Greqi mbetet për t’u sqaruar nga autoritetet të cilat e bënë lidhjen e dy rasteve brenda një periudhe 15 ditore.
Organizata kriminale në fjalë për çdo helenizim merrte 30 mijë euro. Ata arritën të “pastronin” disa kriminelë, kryesisht shqiptarë, duke i bërë grekë, duke u dhënë karta ID të reja si dhe pasaporta.
Fitimet e organizatës kriminale, e drejtuar nga një oficer i policisë greke dhe 34 efektivë të tjerë policie, 10 prej të cilëve të arrestuar, kanë kaluar 5 milionë euro në tetë vitet e fundit. Është karakteristike se deri më tani janë konfiskuar mbi 600 mijë euro, ndërsa vetëm në kasafortën e oficerit që ishte truri i rrjetit janë gjetur 320 mijë euro.
Organizata thuhet se ka funksionuar që nga prilli 2013. Pas shumë muajsh dhe hetimi sistematik të Shërbimit të Punëve të Brendshme të Forcave të Sigurisë, në orët e mëngjesit dhe të pasdites së datës 30–11–2021, brenda kufijve të autostradës u arrestuan 20 persona, mes të cilëve 9 punonjës policie (një oficer), një nëpunës civil i Ministrisë Mbrojtjen e Qytetarëve, një regjistrues OTA, një avokat dhe tetë shtetas të tjerë. Në total, sipas hetimeve të deritanishme, në organizatën kriminale ka prova se janë përfshirë 34 punonjës policie.
Nga hetimet e deritanishme ka rezultuar se të paktën nga data 26–04–2013 deri më 30–11–2021 është krijuar dhe ka funksionuar një organizatë kriminale , e përbërë kryesisht nga grekë.
Rrjeti kishte krijuar një rrjet tjetër bashkëpunëtorësh dhe ishte aktiv në dhënien e kartave origjinale (zakonisht) greke të identitetit, pasaportave greke dhe patentë shoferëve për shtetas të huaj me precedentë të rëndë kriminalë, që kërkonin fitimin e pronave të paligjshme.
Në të njëjtën kohë, ata lehtësuan qëndrimin e paligjshëm në vend të shtetasve të huaj, të cilët gëzonin të gjitha të drejtat e shtetasve grekë, si lëshimi i numrit të regjistrimit tatimor, numrit të regjistrimit të sigurimeve shoqërore dhe shërbimeve publike kompetente, duke e vështirësuar për gjetjen dhe arrestimin e disa prej tyre (me precedentë të rënduar kriminale) si dhe lehtësimin e daljes së tyre nga Greqia drejt vendeve të tjera, veçanërisht në Bashkimin Evropian dhe zonën Shengen ku u arrestuan disa mbajtës të dokumenteve “false”. /abcnews.al/
