Kreu i PD-së Lulzim Basha, ka hedhur votën e tij në kuti në selinë qendrore në Tiranë, për kryetarin e ri të Partisë Demokratike.
Në një komunikim për mediat, Basha u shpreh se Partia Demokratike e ka nisur betejën me vlerat e demokracisë, shprehjes së lirë dhe debatit dhe se sipas tij me këto vlera do të rrëzojë regjimin Rama-Doshi.
“Dua të falënderoj mediat për mbulimin që po i bëjnë këtij procesi unik. Dua të falënderoj të gjithë demokratët anembanë të Shqipërisë dhe të gjithë ata që janë kujdestarë të procesit. Në këtë proces unik, të vlerave tona të procesit të zgjedhjes me një anëtar një votë të kryetarit të PD-së.
Këto janë vlerat tona të demokracisë të shprehjes së lirë dhe të debatit. Me këto vlera e kemi nisur betejën për Shqipërinë dhe shqiptarët dhe me këto vlera do ta çojmë deri në fund betejën për rrëzimin e regjimit Rama –Doshi”, tha Basha.
Basha është përballë tre kandidatëve të tjerë, Fatbardh Kadilli, Edith Harxhi dhe Agron Shehajt.
Kujtojmë se qendrat e votimit janë hapur në orën 08:00 dhe procesi do të përfundojë në orën 19:00. Ndërkohë në të gjithë vendin janë 76 qendra votimi dhe 75 mijë votues./i.k/abcnews.al/
