Von der Leyen ka nisur fjalimin e saj, fillimisht duke uruar Roberta Metsola për rizgjedhjen e saj si Presidente e Parlamentit Europian.
“Të nderuar anëtarë, u bënë 5 vjet që kam kërkuar votëbesimin tuaj për herë të parë. Nuk do t’i harroj kurrë momentet prekëse që jetuam së bashku.
Në këtë sallë propozuam BE-në e gjeneratës së ardhshme, ndërsa para të gjithëve presidenti i Ukrainës foli për luftën dhe askush nuk mundi t’i mbajë lotët”.
“Ne jemi në një periudhë shqetësuese”, tha ajo, duke iu drejtuar 720 eurodeputetëve përpara votimit vendimtar të sotëm.
Ajo tha se dëshiron një Europë më të fortë dhe më demokratike.
“Jam e bindur se Europa, një Europë e fortë, mund të përballojë sfidën dhe prandaj kërkoj besimin tuaj sot”, theksoi von der Leyen.
Nga foltorja e Parlamentit Europian, Ursula von der Leyen e përshkroi sulmin rus në një spital për fëmijë në Kiev si një “mesazh të tmerrshëm”.
“Përgjigja jonë ndaj këtij mesazhi duhet të jetë e qartë. Askush nuk dëshiron paqe më shumë se qytetarët ukrainas.
Mesazhi ynë është se ne do të qëndrojmë pranë Ukrainës për aq kohë sa të duhet”, tha ajo.
Më pas ai deklaroi se prania e Frontex duhet të rritet në 30,000, duke theksuar se “kufijtë më të sigurt do të na ndihmojnë të menaxhojmë imigracionin në mënyrë më të drejtë.
Është një hap i madh përpara që ne kemi vënë solidaritetin në qendër të përgjigjes sonë. Nevojitet një përgjigje europiane dhe një përgjigje e fortë”.
“Emigrantët janë njerëz me të drejta. Disa pesimistë menduan se nuk do të pajtoheshim për emigracionin, por ne u treguam se e kishin gabim.
Ne duhet të mbështesim Shtetet Anëtare dhe të zbatojmë këtë legjislacion. Unë kam nevojë për një qasje të përbashkët në mënyrë që deportimi të bëhet me dinjitet”, përfundoi ajo.
/abcnews.al
