Dy persona janë vënë në prangat e policisë së Tiranës ndërsa një tjetër është shpallur në kërkim pas kontrolleve që u ushtruan në dy lokale për vënien e basteve sportive nëpërmjet celularit.
Gjatë kontrolleve të ushtruara në dy lokalet në zona të ndryshme të Tiranës, në aparatet celulare të dy shtetasve të arrestuar, u gjetën faqe që shërbejnë për vënien e basteve sportive.
Të arrestuarit, 35 dhe 54 vjeç, akuzohen për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, parashikuar nga neni 197 i Kodit Penal.
Gjithashtu po punohet për kapjen e shtetasit tjetër, pronar i një lokali në rrugën e Barrikadave. Në cilësinë e provës materiale u sekuestruan aparatet celulare./abcnews.al
