Barcelona i kishte fituar të shtatë ndeshjet e fundit mes kampionatit dhe Champions League, por sot pësoi një humbje të turpshme. Messi me shokë u përmbysën nga Levante, që shënoi tre gola brenda 7 minutave!
Ndeshja nisi mirë për miqtë. Leo Messi u tregua i saktë nga pika e penalltisë dhe kaloi Barçën në avantazh. Pjesa e parë u mbyll 0-1, ndërsa në të dytën ndodhi e pabesueshmja.
Levante rriti presionin, ekipi katalanas u vetëkënaq dhe nuk i besoi syve. Vendasit barazuan rezultatin me anë të Campana në minutën e 61-të. Dy minuta më vonë erdhi goli i avantazhit nëpërmjet sulmuesit Mayoral (shënoi një gol të bukur).
Levante nuk u mjaftua me kaq dhe shënoi sërish. Nemanja Radoja vulosi “trisin” në minutën e 68-të, teksa tifozët shijuan 7 minuta të çmendura të ekipit të tyre të zemrës. Messi tentoi të rihapte ndeshjen, por goli i tij u anulua nga VAR-i për pozicion jashtë loje.
Përfundimisht 3-1 për Levanten, që ngjitet në vend të tetë me 17 pikë, ndërsa Barcelona mund ta humbasë vendin e parë nëse Real Madrid fiton në mbrëmje kundër Betis. /abcnews.al
Levante – Barcelona 3-1
(Campana 61′, Mayoral 63′, Radoja 68′ / Messi (pen) 38′)
