Paul Merson, mesfushori legjendar i Arsenalit nga viti 1985 deri në vitin 1997, flet sërish për luftën e tij kundër varësisë së tij ndaj alkoolit dhe lojërave të fatit, që e çuan atë të shpërdoronte më shumë se 8.3 milionë euro.
Ai, i cili rrëfen se e ka shumë të vështirë të jetë me para pas disa vitesh luftë kundër bixhozit, thotë se gruaja e tij i kontrollon telefonin çdo ditë dhe i jep para xhepi për shpenzimet e tij ditore (një shumë minimale parash për benzinë dhe blerjet bazë). “Është një betejë e vazhdueshme, çdo ditë,”- thotë Paul Merson në ‘GB News’ për luftën e tij të përditshme kundër lojërave të fatit.
“Është e trishtueshme ajo që ka ndodhur, por unë isha i sëmurë dhe këtë kam kuptuar. Unë jam një person i sëmurë, që përpiqem të përmirësohem. Unë nuk jam një person i keq apo një person i dobët, që dështoj çdo ditë të jetës sime. Unë isha një person i sëmurë që duhej të shërohesha shumë shpejt”, shpjegon ish-lojtari i Aston Villa, Portsmouth, Walsall dhe Middlesbrough, i cili pranoi, se ai u rikthye te lojërat e fatit gjatë izolimit për shkak të pandemisë së koronavirusit.
Në vitin 2021, Paul Merson tha për “Sky Sports”, duke folur për dokumentarin e tij “Futboll, bixhoz dhe unë”, se ai rrezikoi kursimet që kishte familja e tij për të blerë një shtëpi: “Mendova se thjesht duhet të vras veten. Unë e di që jam i sëmurë, që do të thotë se nuk duhet të luaj bixhoz dhe nuk duhet të pi. Kjo është arsyeja pse e bëra këtë shfaqje, që ai person që është i sëmurë ta shikojë dhe të mendojë: “Jam i sëmurë, unë nuk jam njeri i keq dhe duhet të ndryshojë”,- shprehet ai./h.ll/abcnews.al
