Autoambulanca e Sarandës është përmbysur në autostradën Lushnje- Fier pranë zonës së quajtur “Pushimit i Shoferit” pas përplasjes me një automjet tip mercedez-benz.
Brenda saj ndodheshin pesë persona, ndërsa pacienti Mehdi Marku, 62- vjeç i cili po dërgohej për mjekim në Tiranë ka vdekur në vend.
Aksidenti ka ndodhur rreth orës 17: 45 min.
Sipas mjekut që shoqëronte pacientin nga Saranda për në Tiranë, brenda ambulancës ndodhej viktima, djali i tij, infermierja, mjeku dhe drejtuesi i mjetit.
Viktima dhe i biri ishin në pjesën e pasme të ambulancës ndërsa tre të tjerët ulur përpara.
Si pasojë e përplasjes mjeti është kthyer përmbys ndërsa pacienti që ishte mbrapa ka vdekur në vend dhe i biri është plagosur.
Ai është dërguar në spitalin e Lushnjës dhe është jashtë rrezikut për jetën.
Dyshimet e policisë lidhur me këtë aksident janë shpejtësia tej normave të lejuara dhe parakalimi i gabuar.
Dy drejtuesit e mjeteve janë shoqëruar në policinë e Lushnjës dhe po merren në pyetje për zbardhjen e rrethanave të ngjarjes.
Njoftimi i policisë:
Fier
Informacion paraprak
Sot rreth orës 17:50, në aksin rrugor Fier-Lushnje, në afërsi të fshatit Krutje, një ambulancë që po transportonte një pacient drejt Tiranës, ka dalë nga rruga.
Si pasojë ka ndërruar jetë pacienti, shtetasi M.M, 62 vjeç, dhe është dëmtuar drejtuesi i ambulancës, shtetasi N.H, 55 vjeç, banues në Sarandë, i cili ndodhet në spitalin e Lushnjes nën kujdesin e mjekëve.
Grupi hetimor ndodhet në vendngjarje dhe po punon për zbardhjen e plotë të rrethanave të kësaj ngjarje./abcnews.al
