Mbyllet pa fitues ndeshja e parë mes Napolit dhe Barcelonës në “San Paolo”. Skuadra italiane gjeti golin e avantazhit në pjesën e parë me anë të Dries Mertens, katalanasit barazuan në të dytën falë golit të Griezmann dhe kualifikimi do të zgjidhet në Spanjë, aty ku normalisht që Barcelona është e avantazhuar.
Atmosfera në stadium ishte e shkëlqyer, teksa Leo Messi zbriti për herë të parë në tempullin e Diego Maradonës. U desh të kalonte gjysmë ore lojë që të zhbllokohej ndeshja. Dries Mertens dhuroi një perlë dhe la të shtanguar gjermanin Ter Stegen.
Tifozët në festë dhe Napoli në avantazh. Pjesa e parë u mbyll me rezultatin 1-0, ndërsa Barcelona ia doli të shënonte në të vetmen gjuajtje në portën e vendasve. Busquets “shpiku” një pasim gjenial për Semedo në minutën e 57-të dhe mbrojtësi gjeti Griezmann në zonë.
Sulmuesi francez goditi menjëherë dhe dërgoi topin pas shpinës së Ospina. Kaq e kishte Barcelona, ndërsa Leo Messi nuk ishte në ditën e tij më të mirë dhe qëndroi në hije. Në fund pati një karton të kuq për Arturo Vidal, i cili do të mungojë në ndeshjen e kthimit, përballje që do të luhet në 18 mars. /abcnews.al
Napoli-Barcelona 1-1
(Mertens 30′ / Griezmann 57′)
