Racing Club-Arsenal Sarandi në Argjentinë është mbyllur me rezultatin e pastër 0-2, ndërkohë që vëmendjen në atë përballje e ka tërhequr goli i parë i shënuar nga Lucas Albertengo.
Që në minutën e katërt, futbollistët e skuadrës mike vendosën të aplikojnë një skemë në goditje dënimi dhe gjithçka shkoi në mënyrë perfekte. Papa asistoi për Albertengo dhe ky i fundit para portës nuk gaboi.
Perfekte, sikurse kishte ndodhur edhe në Shqipëri. Luhej finalja e Kupës së Shqipërisë, mes Laçit dhe Kukësit. Cetkovic bëri murin, James Adeniyi e dërgoi topin përtej vijës finale.
Skema e Cungut ishte realizuar me sukses, madje vetë shkodrani më pas kishte zbuluar se në stërvitje asnjëherë nuk e kishin finalizuar. Ndodhi atëherë kur duhej, në finalen e Kupës. /abcnews.al
