“Video-lojërat i argëtojnë fëmijët dhe nuk u bëjnë asnjë të mirë.” Me siguri keni dëgjuar shumë njerëz që mbështesin diçka të tillë, por kërkimet e reja vijnë për t’iu përgjigjur sa më sipër si një kundërargument.
Një studim i lidhur nga Instituti Karolinska në Suedi, arriti në përfundimin se fëmijët që luajnë video lojëra brenda një periudhe normale kohore, priren të kenë një IQ më të lartë.
Hulumtimi, i cili zgjati dy vjet, përfshiu më shumë se 9000 fëmijë të moshës 9 dhe 10 vjeç, të cilët iu nënshtruan një sërë testesh të ndryshme të inteligjencës dhe perceptimit. Rezultatet e hulumtimit, të publikuara në Scientific Reports, janë me interes të madh.
Pak më shumë se 5000 prej fëmijëve u ndoqën pas dy vitesh, kur iu kërkua të përsërisnin testet psikologjike. Kjo i lejoi studiuesit të studionin se si performanca e testit të fëmijëve ndryshonte nga një test në tjetrin dhe të kontrollonin dallimet individuale në testin e parë. Ata gjithashtu kontrolluan për dallime gjenetike që mund të ndikojnë në inteligjencën dhe dallime që mund të lidhen me sfondin arsimor dhe të ardhurat e prindërve.
Prindërit u pyetën se sa orë kalojnë fëmijët e tyre para një ekrani dhe sondazhi mesatar tregoi se fëmijët shikojnë 2.5 orë televizor çdo ditë, gjysmë ore duke lëvizur nëpër mediat sociale dhe një orë duke luajtur videolojëra. Siç vërehet, fëmijët që shpenzojnë më shumë kohë në videolojëra e rritën IQ-në e tyre me rreth 2.5 pikë gjatë këtyre dy viteve.
Në fakt, duket se nuk ka ndikuar në socializimin e fëmijëve, siç i frikësohen shumë prindërve. Ajo që video lojërat duket se u ofrojnë fëmijëve është se u mundësojnë atyre të zhvillojnë të menduarit më logjik, të jenë në gjendje të zgjidhin më shpejt problemet komplekse dhe të mësojnë më lehtë.
Sipas studiuesit kryesor Dr Torkel Klingberg, i cili është profesor i neurologjisë, ekranet dhe shkëlqimi i tyre nuk dukej se luanin një rol në perceptimin e fëmijëve ose nuk kishin ndonjë efekt tjetër anësor.
Hulumtimi zbuloi gjithashtu se as televizioni dhe as mediat sociale nuk ndikojnë negativisht në inteligjencën e fëmijëve dhe as nuk e përmirësojnë atë siç bëjnë lojërat video./abcnews.al
