Ajaxi nuk është më ai i sezonit të kaluar dhe humbja e sotme përballë Heracles e ka bërë më interesante garën për titull në Holandë. Skuadra e Ten Hag u befasua në stadiumin e Heracles nga vendasit, që triumfuan falë një goli shumë të bukur të belgut Dessers.
Sulmuesi vendas mori një asist nga portieri në minutën e 77-të, përfitoi nga pasiguria e Blind dhe mposhti portierin Onana me një goditje fluturimthi. Kjo fushë po kthehet në makth për kampionët në fuqi, të cilët nuk fitojnë në stadiumin e Heracles prej shtatorit të vitit 2016.
Transferta e tretë radhazi me humbje në kampionat për Ajax që sheh AZ Alkmar t’i afrohet. “Harkëtarët” kryesojnë me 53 pikë dhe kanë vetëm tre pikë më shumë se AZ. Skuadra më e madhe holandeze u mposht edhe të enjten përballë Getafes në Europa League dhe situata nuk është aspak e mirë. /abcnews.al
Heracles-Ajax 1-0
(Dessers 77′)
