Edhe kryebashkiaku i Tiranës Erion Veliaj, që do të kandidojë për një mandat të dytë në zgjedhjet e 30 Qershorit deklaron se këto zgjedhje do të zhvillohen, pavarësisht opozitës. Duke folur në emisionin “Opinion” në Tv Klan, Veliaj tha se opozita e ka të pamundur të pengojë zhvillimin e zgjedhjeve.
“Unë nuk kandidoj për të marrë pëlqimin e opozitës, nëse opozita nuk vjen është turpi i tyre, nëse vazhdoj bëj punën është në nderin tim”– u shpreh Veliaj.
Sipas tij, opozita po proteston vetëm sepse nuk fiton dot në zgjedhje. Veliaj tha se kjo është arsyeja pse opozita po refuzon të angazhohet për reformën zgjedhore, megjithë thirrjen e përsëritur të Kryeministrit dhe të maxhorancës.
Duke folur për projektet në punën e tij, Erjon Veliaj tha se Tirana do të ketë Teatrin Kombëtar të ri dhe modern, në një godinë të re që plotëson të gjitha standardet. Kreu i Bashkisë u shpreh se zgjedhjet e 30 Qershorit janë edhe referendum më i mirë edhe për vetë opozitën, nëse qytetarët e duan një Teatër të ri modern në Tiranë./abcnews.al
