Lajmi për vdekjen e legjendës së futbollit gjerman, Franz Beckenbauer, i ka befasuar të gjithë dhe menjëherë kanë ardhur edhe ngushëllimet për numrin një të mbrojtjes të asaj kohe.
Në lidhje me këtë lajm, ka reaguar edhe kryeministri i Shqipërisë, Edi Rama, duke e cilësuar të ndjerin si një valltar i dalë nga koreografitë e mjeshtreve të baletit modern në qendrën e mbrojtjes gjermane.
Reagimi i Edi Ramës:
Kaiser Franz ishte si një valltar i dalë nga koreografitë e mjeshtrave të baletit modern në qendrën e mbrojtjes së Gjermanisë, ku ngriti kupën e botës e më pas, si një personazh i letërsisë gjermane në këmbë përpara stolit të Bundesmanschaft-it, kur e udhëhoqi Gjermaninë drejt një tjetër Kupe të Botës.
Me ikjen e tij shuhet një tjetër legjendë e gjallë e sportit më të dashur në botë dhe shkëputet një tjetër copë e bukur e fëmijërisë sonë, atëherë kur futbolli ndërkombëtar ishte vetë bota në Shqipërinë e burgosur brenda mureve të komunizmit./ h.ll/abcnews.al
