Betejat midis forcave armene dhe azere mbi rajonin e diskutueshëm të Nagorno-Karabakh, kanë vazhduar gjatë natës, ndërsa thirrjet ndërkombëtare për qetësi pas luftimeve më të rënda midis dy vendeve në vite u rritën.
Ministria armene e mbrojtjes të hënën në mëngjes njoftoi luftime gjatë gjithë natës, ndërsa ministria e mbrojtjes e Azerbajxhanit tha se forcat armene po bombardonin qytetin e Terter.
Përplasjet midis dy ish republikave Sovjetike, të cilat zhvilluan një luftë në vitet 1990, ishin shpërthimi i fundit i një konflikti të gjatë mbi Nagorno-Karabakh, një rajon i shkëputur që është brenda Azerbajxhanit por drejtohet nga armenët etnikë.
Shtatëmbëdhjetë luftëtarë separatistë armenë u vranë dhe më shumë se 100 u plagosën në luftimet që filluan të dielën në mëngjes, tha udhëheqësi i Nagorno-Karabakh, Araik Harutyunyan, duke pranuar se forcat e tij kishin “humbur pozicionet”. Të dy palët raportuan gjithashtu viktima civile.
Përplasjet nxitën reagime diplomatike për të zvogëluar tensionin në një konflikt të vjetër mes frikës se dhuna mund të dalë jashtë kontrollit. g.v/abcnews.al
