Eksperti amerikan i sëmundjeve infektive, Anthony Fauci, së fundmi është shprehur se Amerika mund të arrijë imunitet të mjaftueshëm kolektiv ndaj COVID-19 përmes vaksinimeve për të rifituar “një farë normaliteti” deri në vjeshtën e 2021, me gjithë pengesat e hershme në përhapjen e vaksinave.
Në një intervistë të dhënë për mediat e huaja Fauci ka komentuar dhe diskutimin e tij rreth pandemisë me guvernatorin e Kalifornisë, Gavin Newsom, i cili njoftoi në fillim se një variant më infektiv i koronavirusit i gjetur fillimisht në Britani ishte zbuluar në shtetin e tij, një ditë pasi u dokumentua rasti i parë i njohur në SHBA, përkatësisht në Kolorado.
Newsom tha se varianti i koronavirusit B.1.1.7 ishte konfirmuar më herët gjatë ditës në një pacient të Kalifornisë Jugore por nuk dha detaje të tjera.
Por Departamenti i Shëndetit Publik të Kalifornisë tha në deklaratë më vonë se personi, një pacient i qarkut San Diego, nuk ka histori të njohur të udhëtimit, duke sugjeruar se varianti po përhapet brenda komunitetit.
Fauci tha se ai “nuk ishte i befasuar”, duke shtuar se raste shtesë të variantit ka të ngjarë të shfaqen në të gjithë vendin dhe se natyra mutante e viruseve të tilla është normale.
“Duket se ky mutacion i veçantë e bën virusin më të mirë në transmetim nga një person tek tjetri”, tha ai.
Sidoqoftë, individët e infektuar me forma të mëparshme të SARS-CoV-2 “nuk duket se infektohen përsëri nga kjo”, që do të thotë se çdo imunitet i fituar tashmë “është mbrojtës ndaj këtij lloji të veçantë”, shtoi Fauci.
Eksperti ka theksuar ndër të tjera se i ashtuquajturi variant i Mbretërisë së Bashkuar besohet të mos jetë më i rëndë në sëmundjen që shkakton dhe se vaksinat e sapo aprovuara ndaj COVID-19 do të jenë po aq efektive kundër tij sa kundër formave të njohura më parë të virusit.
E njëjta gjë besohet të jetë e vërtetë për një variant të dytë të ri, gjithashtu më infektiv dhe i raportuar për herë të parë në Afrikën e Jugut, sipas Qendrave të SHBA-së për Kontrollin dhe Parandalimin e Sëmundjeve (CDC).
Gjithsesi, shfaqja e një varianti shumë më të trasmetueshëm mund të bëjë që një imunizim i shpejtë të bëhet edhe më kritik./abcnews.al
