Napoli-Barcelona është një nga përballjet më interesante të raundit të 1/8 në Champions League. Ernesto Valverde nuk i kursen elozhet për ekipin italian dhe vlerëson dy lojtarë të ekipit të Gattusos në prononcimin e dhënë për Barça TV.
Në miqësoren e zhvilluar në gusht fitoi Barcelona 2-1 me golat e Busquets dhe Rakitic, ndërkohë që Umtiti shënoi autogol në portën e tij. Trajneri i Barcelonës ndalet edhe te atmosfera elektrizuese që krijohet nga tifozët italianë në “San Paolo”, por thekson se Barcelona është mësuar me përballje dhe vështirësi të tilla.
“Napoli është një kundërshtar i fortë dhe i komplikuar. Do të përballemi me një atmosferë fantastike në stadiumin e tyre, kështu që nuk duhet t’i nënvlerësojmë. Nuk e di se në çfarë forme do të jetë Napoli në ndeshjet kundër nesh. Kanë lojtarë të rëndësishëm si Insigne dhe Mertens.
Në miqësoren e zhvilluar në SHBA treguan se kanë shumë cilësi në mesfushë dhe luajnë një futboll të bukur. Stadiumi ‘San Paolo’? Një ambient i mrekullueshëm, tifozët janë shumë të zjarrtë, por jemi mësuar të luajmë në të tilla kushte“, përfundon Ernesto Valverde, i cili ka provuar të luajë në këtë stadium në vitin 2014 kur drejtonte Athletic Bilbao. /abcnews.al
