Një dron izraelit goditi sot pozicionet ushtarake të Hamasit në Rripin e Gazës ndërsa protestat e dhunshme vazhdojnë përgjatë murit të sigurisë.
Ushtria izraelite tha se droni kishte në shënjestër dy pozicione të grupit islamik Hamas, i cili kontrollon Gazën, ndërsa një tank goditi një pozicion tjetër, nga i cili qëlluan ndaj ushtarëve që u përleshën me protestuesit.
Stacioni radiofonik Aqsa i lidhur me Hamasin raportoi se dy persona u plagosën.
Palestinezët në Gaza kanë organizuar demonstrata përgjatë murit prej disa ditësh. Ata hedhin gurë dhe mjete shpërthyese të improvizuara ndaj ushtarëve izraelitë, të cilët përgjigjen me zjarr. Sipas ushtrisë, balonat ndezëse të lëshuara nga protestuesit shkaktuan zjarre në territorin izraelit pranë kufirit.
Sipas Ministrisë së Shëndetësisë së Hamasit, 28 palestinezë janë plagosur në këto përleshje që nisën me plagosjen fatale të një protestuesi nga ushtarët.
